രാജ്യത്തെ ക്രെഡിറ്റ് കാർഡ് ഉപയോഗം പുതിയ ഉയരങ്ങളിലേക്ക്. റിസർവ് ബാങ്ക് ഓഫ് ഇന്ത്യ (ആർബിഐ) പുറത്തുവിട്ട ഏറ്റവും പുതിയ കണക്കുകൾ പ്രകാരം, ജൂൺ മാസത്തിലും രാജ്യത്തെ മൊത്തം ക്രെഡിറ്റ് കാർഡ് ചെലവഴിക്കൽ 2 ലക്ഷം കോടി രൂപ (₹2 trillion) കടന്നു. മെയ് മാസത്തിന് ശേഷം തുടർച്ചയായ രണ്ടാം മാസമാണ് ഈ നേട്ടം കൈവരിക്കുന്നത്. ബാങ്കിംഗ് മേഖലയിലെ ചില മുൻനിര സ്വകാര്യ ബാങ്കുകളുടെ കാർഡ് ബിസിനസ്സ് മുൻ മാസത്തെ അപേക്ഷിച്ച് നേരിയ കുറവുണ്ടായെങ്കിലും, എച്ച്ഡിഎഫ്സി ബാങ്കും എസ്ബിഐ കാർഡും മികച്ച വളർച്ച കൈവരിച്ചതാണ് ആകെ തുക ഉയർന്നുനിൽക്കാൻ കാരണമായത്. ജൂൺ മാസത്തിൽ മുൻ വർഷത്തെ ഇതേ മാസത്തെ അപേക്ഷിച്ച് 9.8 ശതമാനത്തിന്റെ വർധനയുണ്ട്. രാജ്യത്തെ മൊത്തം ക്രെഡിറ്റ് കാർഡുകളുടെ എണ്ണം 12.16 കോടി ആയി ഉയർന്നു. HDFC Bank ₹59,432 കോടിയും SBI Card ₹41,077 കോടിയും ICICI Bank ₹31,410.9 കോടിയുടേയും ബിസിനസ്സ് നേടി.
അതേസമയം, പബ്ലിക് സെക്ടർ (പൊതുമേഖലാ) ബാങ്കുകൾ കാഴ്ചവെച്ച മികച്ച പ്രകടനമാണ് വ്യവസായ മേഖലയിലെ ഈ 10% വളർച്ചയ്ക്ക് കരുത്തായത്. RuPay ക്രെഡിറ്റ് കാർഡുകളെ UPI-യുമായി ബന്ധിപ്പിക്കാനുള്ള സൗകര്യം പൊതുമേഖലാ ബാങ്കുകൾക്ക് കൂടുതൽ ഉപഭോക്താക്കളെ ആകർഷിക്കാനും ബിസിനസ്സ് കൂട്ടാനും സഹായകരമായി. ജൂൺ മാസത്തിൽ മാത്രം പുതിയതായി ലക്ഷക്കണക്കിന് കാർഡുകളാണ് വിപണിയിലെത്തിയത്. HDFC Bank 1,63,511 പുതിയ കാർഡുകളും, SBI Card 1,62,664 പുതിയ കാർഡുകളും പുതിയതായി വിറ്റിട്ടുണ്ട്.
RBI data reveals India’s credit card spends exceeded ₹2 trillion in June for the second consecutive month, driven by HDFC Bank and SBI Card growth
