രാജ്യം വികസിത ഭാരതം എന്ന ലക്ഷ്യത്തിലേക്ക് നീങ്ങുമ്പോൾ യുവജനങ്ങൾ ശാരീരികമായും മാനസികമായും ആരോഗ്യത്തോടെ ഇരിക്കേണ്ടത് അത്യന്താപേക്ഷിതമാണെന്ന് പ്രധാനമന്ത്രി നരേന്ദ്ര മോദി വ്യക്തമാക്കി. ലഹരിയുടെ പിടിയിൽ നിന്ന് യുവതലമുറയെ മോചിപ്പിക്കുന്നതിന്റെ ഭാഗമായി ‘നശാ മുക്ത് യുവ ഫോർ വിക്സിത് ഭാരത് സങ്കൽപ് അഭിയാൻ’ എന്ന പുതിയ ദേശീയ കാമ്പെയ്ന് അദ്ദേഹം തുടക്കം കുറിച്ചു. അടുത്ത 100 ആഴ്ചകളിലായി രാജ്യത്തുടനീളം കലാ-സാംസ്കാരിക-കായിക പരിപാടികൾ സംഘടിപ്പിച്ചുകൊണ്ട് ലഹരി വിരുദ്ധ സന്ദേശം ജനങ്ങളിലേക്കെത്തിക്കുമെന്ന് അദ്ദേഹം പറഞ്ഞു.
സ്റ്റാർട്ടപ്പുകൾ, ആർട്ടിഫിഷ്യൽ ഇന്റലിജൻസ്, കായികം, ബഹിരാകാശം തുടങ്ങി വിവിധ മേഖലകളിൽ രാജ്യത്തിന്റെ ഭാവി നിർണ്ണയിക്കേണ്ടത് ഇന്നത്തെ യുവജനങ്ങളാണെന്ന് അദ്ദേഹം ഓർമ്മിപ്പിച്ചു. ലഹരി ഉപയോഗം ഒരു വ്യക്തിയെയും കുടുംബത്തെയും തകർക്കുന്നതിനൊപ്പം രാജ്യത്തിന്റെ ശക്തിയെയും ദുർബലപ്പെടുത്തുമെന്ന് ചൂണ്ടിക്കാട്ടിയ പ്രധാനമന്ത്രി, ലഹരിക്കെതിരെയുള്ള പോരാട്ടത്തിൽ സമൂഹം ഒറ്റക്കെട്ടായി നിൽക്കണമെന്ന് ആഹ്വാനം ചെയ്തു. മയക്കുമരുന്ന് കടത്തുകാർക്കെതിരെ സർക്കാർ കർശന നടപടികൾ സ്വീകരിച്ചുവരികയാണെന്നും, ലഹരിയിൽ നിന്ന് മോചിതരാകുന്നവരെ സമൂഹം ആദരിക്കണമെന്നും അദ്ദേഹം കൂട്ടിച്ചേർത്തു.
PM Narendra Modi launches the ‘Nasha Mukt Yuva for Viksit Bharat Sankalp Abhiyan’ campaign, urging society to unite against drug abuse to build a developed nation.
