ഡൽഹി എയിംസിലെ (AIIMS) ഡോക്ടർമാരും ഗവേഷകരും ചേർന്ന് സ്തനാർബുദം തുടക്കത്തിൽ തന്നെ കണ്ടെത്താൻ സഹായിക്കുന്ന പുതിയ ആർട്ടിഫിഷ്യൽ ഇന്റലിജൻസ് (AI) ടൂൾ വികസിപ്പിച്ചു. മാമ്മോഗ്രാം ചിത്രങ്ങൾ പരിശോധിച്ച് റേഡിയോളജിസ്റ്റുകൾക്ക് കൃത്യമായ മുന്നറിയിപ്പ് നൽകാൻ സഹായിക്കുന്നതാണ് ഈ എഐ ഉപകരണം. ഈ സാങ്കേതികവിദ്യയുടെ തുടർവികസനത്തിനും നിയന്ത്രണ അനുമതികൾ നേടുന്നതിനുമായി ആരോഗ്യ സാങ്കേതിക കമ്പനിയായ ബി.പി.എൽ ടെക്നോളജീസിന് (BPL Technologies) എയിംസ് ഇത് കൈമാറി. പൂർണ്ണമായും ഇന്ത്യൻ ഡാറ്റ ഉപയോഗിച്ച് പരിശീലനം നൽകി വികസിപ്പിച്ച ഈ മാമ്മോഗ്രാം എഐ മോഡൽ, വിദഗ്ദ്ധരായ റേഡിയോളജിസ്റ്റുകളുടെ കുറവുള്ള ആശുപത്രികളിൽ ക്യാൻസർ കണ്ടെത്തൽ പിഴവുകൾ ഒഴിവാക്കാൻ വലിയൊരു സുരക്ഷാ കവചമായി പ്രവർത്തിക്കും.
എയിംസിലെ മൂവായിരത്തിലധികം രോഗികളിൽ നടത്തിയ പരിശോധനയിൽ ഈ എഐ ടൂളിന്റെ കൃത്യത 99 ശതമാനമാണെന്ന് കണ്ടെത്തിയിട്ടുണ്ട്. കഴിഞ്ഞ ഒരു വർഷമായി എയിംസിൽ ട്രയൽ മോഡിൽ പ്രവർത്തിച്ചുവരുന്ന ഈ ഉപകരണം, ബി.പി.എൽ ടെക്നോളജീസിന്റെ സഹായത്തോടെയുള്ള ഔദ്യോഗിക അനുമതികൾ ലഭിച്ചാൽ അടുത്ത ആറുമാസത്തിനകം രാജ്യത്തെ മറ്റ് ആശുപത്രികളിലേക്കും എത്തിയേക്കും. സെപ്റ്റംബർ 16-ന് എയിംസ് ഡയറക്ടർ പ്രൊഫ. നിഖിൽ ടണ്ടൻ, ബി.പി.എൽ ചീഫ് ഫിനാൻഷ്യൽ ഓഫീസർ അജയ് ജിൻഡാൽ എന്നിവരുടെ സാന്നിധ്യത്തിലാണ് സാങ്കേതികവിദ്യ കൈമാറ്റം നടന്നത്. അക്കാദമിക ഗവേഷണങ്ങളെ സാധാരണക്കാരുടെ ആരോഗ്യ ആവശ്യങ്ങളിലേക്ക് എത്തിക്കുന്നതിൽ ഈ പദ്ധതി നിർണ്ണായക ചുവടുവയ്പ്പായിരിക്കുമെന്ന് അധികൃതർ വ്യക്തമാക്കി.
AIIMS Delhi develops an AI tool to assist radiologists in detecting breast cancer from mammograms, transferring the technology to BPL Technologies for deployment
