ആപ്പിളിന്റെ ഡിജിറ്റൽ പേയ്മെന്റ് സേവനമായ ‘ആപ്പിൾ പേ’ (Apple Pay) അടുത്ത മാസം ഇന്ത്യയിൽ അവതരിപ്പിച്ചേക്കുമെന്ന് റിപ്പോർട്ട്. ഇതിന്റെ ഭാഗമായി ആക്സിസ് ബാങ്ക് ആപ്പിളിന്റെ ആദ്യ ബാങ്കിംഗ് പങ്കാളിയാകുമെന്നാണ് സൂചന. പ്രാരംഭ ഘട്ടത്തിൽ ആക്സിസ് ബാങ്ക് ക്രെഡിറ്റ് കാർഡുകൾ മാത്രമായിരിക്കും ആപ്പിൾ പേയിൽ ലഭ്യമാക്കുക. എച്ച്.ഡി.എഫ്.സി. ബാങ്ക്, ഐ.സി.ഐ.സി.ഐ. ബാങ്ക് തുടങ്ങിയ പ്രമുഖ ബാങ്കുകളുമായും ആപ്പിൾ ചർച്ചകൾ നടത്തിയിട്ടുണ്ടെങ്കിലും വ്യവസ്ഥകളിൽ ഇതുവരെ അന്തിമധാരണയായിട്ടില്ല.
ഇന്ത്യയിൽ പേയ്മെന്റ് സേവനം കൊണ്ടുവരാനുള്ള ആപ്പിളിന്റെ ദീർഘകാലത്തെ ശ്രമങ്ങളുടെ ഫലമായാണ് ഈ നീക്കം. കർശനമായ ഡാറ്റാ ലോക്കലൈസേഷൻ ചട്ടങ്ങളും യു.പി.ഐ. സംയോജനത്തിലെ സാങ്കേതിക തടസ്സങ്ങളും കാരണം 2017 മുതൽ ഈ പദ്ധതി വൈകുകയായിരുന്നു. എന്നാൽ കാർഡ് പേയ്മെന്റുകൾക്കായി ഫേസ് ഐ.ഡി, ടച്ച് ഐ.ഡി തുടങ്ങിയ ബയോമെട്രിക് സംവിധാനങ്ങൾക്ക് കഴിഞ്ഞ വർഷം റിസർവ് ബാങ്ക് (RBI) അനുമതി നൽകിയതോടെയാണ് ആപ്പിൾ പേയ്ക്ക് ഇന്ത്യയിലേക്ക് പ്രവേശനം സാധ്യമായത്.
രാജ്യത്തെ ഡിജിറ്റൽ പേയ്മെന്റ് വിപണിയിൽ ഭൂരിഭാഗവും കൈയടക്കിയിരിക്കുന്ന യു.പി.ഐ-യുടെ ശക്തമായ സാന്നിധ്യത്തിനിടയിലേക്കാണ് ആപ്പിൾ പേ കടന്നുവരുന്നത്. ഐഫോണോ ആപ്പിൾ വാച്ചോ ഉപയോഗിച്ച് കോൺടാക്റ്റ്ലെസ് ആയും സുരക്ഷിതമായും പണമടയ്ക്കാൻ ഉപയോക്താക്കളെ ഇത് സഹായിക്കും. ഇടപാട് ഫീസിന്റെ വിഭജനവുമായി ബന്ധപ്പെട്ട് ബാങ്കുകളുമായി ചെറിയ തോതിൽ അഭിപ്രായവ്യത്യാസങ്ങൾ നിലനിൽക്കുന്നുണ്ടെങ്കിലും, ഭാവിയിൽ കൂടുതൽ ബാങ്കുകളെയും കാർഡ് നെറ്റ്വർക്കുകളെയും ഉൾപ്പെടുത്തി സേവനം ഘട്ടംഘട്ടമായി വ്യാപിപ്പിക്കാനാണ് കമ്പനിയുടെ തീരുമാനം
Apple Pay is expected to launch in India as early as next month in partnership with Axis Bank, allowing iPhone and Apple Watch users to make biometric contactless payments.
