പ്രമുഖ എഡ്-ടെക് കമ്പനിയായ ഫിസിക്‌സ്‌വാല (PhysicsWallah) തങ്ങളുടെ വായ്പാ ഇടപാടുകൾ ഭാഗികമായി അവസാനിപ്പിക്കുന്നതിന്റെ ഭാഗമായി 95.79 കോടി രൂപയുടെ ലോൺ പോർട്ട്ഫോളിയോ നോൺ-ബാങ്കിംഗ് ഫിനാൻഷ്യൽ കമ്പനിയായ ഓക്സിലോ ഫിൻസർവിന് (Auxilo Finserve) വിൽക്കുന്നു. കമ്പനിയുടെ പൂർണ്ണ ഉടമസ്ഥതയിലുള്ള സബ്സിഡിയറിയായ ‘ഫിൻസ് ഫിനാൻസ്’ (FinZ Finance) വഴി നടത്തിവന്നിരുന്ന വായ്പാ പ്രവർത്തനങ്ങളാണ് കൈമാറുന്നത്. ഒക്ടോബർ 3-നാണ് ഇതുസംബന്ധിച്ച കരാർ ഒപ്പുവെച്ചത്. വായ്പകളുടെയും കടക്കാരുടെയും കൈമാറ്റം അടുത്ത 60 ദിവസത്തിനുള്ളിൽ പൂർത്തിയാകുമെന്നാണ് പ്രതീക്ഷിക്കുന്നത്. വിദ്യാർത്ഥികൾക്ക് വിദ്യാഭ്യാസ വായ്പ നൽകുന്നതിൽ ശ്രദ്ധ കേന്ദ്രീകരിക്കുന്ന ആർ.ബി.ഐ അംഗീകൃത എൻ.ബി.എഫ്.സിയാണ് ഓക്സിലോ.
പ്രധാന കോർ ബിസിനസ്സ് പ്രവർത്തനങ്ങളിൽ ശ്രദ്ധ കേന്ദ്രീകരിക്കുന്നതിന്റെയും മൂലധന വിനിയോഗം ഒപ്റ്റിമൈസ് ചെയ്യുന്നതിന്റെയും ഭാഗമായുള്ള തന്ത്രപരമായ പുനഃക്രമീകരണമാണിതെന്ന് കമ്പനി വ്യക്തമാക്കി. വായ്പാ വിതരണവുമായി ബന്ധപ്പെട്ട ബാലൻസ് ഷീറ്റ്, ക്രെഡിറ്റ് റിസ്കുകൾ കുറയ്ക്കാനും പ്രവർത്തനക്ഷമത മെച്ചപ്പെടുത്താനും ഈ നീക്കം സഹായിക്കുമെന്നും കമ്പനി അറിയിച്ചു.
ഭാവിയിൽ സ്വന്തമായി വായ്പ നൽകുന്നതിന് പകരം അംഗീകൃത മൂന്നാം കക്ഷി എൻ.ബി.എഫ്.സി-കൾ വഴി വായ്പാ സൗകര്യങ്ങൾ ലഭ്യമാക്കാനാണ് കമ്പനി ലക്ഷ്യമിടുന്നത്. ഫിൻസ് ഫിനാൻസ് വഴി നൽകിയിരുന്ന വായ്പകളിൽ 70-75 ശതമാനവും ഫിസിക്‌സ്‌വാല പ്ലാറ്റ്‌ഫോമിൽ പഠിക്കുന്ന വിദ്യാർത്ഥികൾക്ക് വേണ്ടിയുള്ളതായിരുന്നു.
