റിപ്പോ നിരക്ക് 25 അടിസ്ഥാന പോയിന്റുകൾ (Basis Points) ഉയർത്തി 5.50 ശതമാനമായി റിസർവ് ബാങ്ക് ഓഫ് ഇന്ത്യ (ആർബിഐ) പ്രഖ്യാപിച്ചതിന് പിന്നാലെ, രാജ്യത്തെ പ്രമുഖ പൊതു-സ്വകാര്യമേഖലാ ബാങ്കുകൾ വായ്പാ പലിശ നിരക്കുകൾ വർദ്ധിപ്പിച്ചു. പഞ്ചാബ് നാഷണൽ ബാങ്ക് (പിഎൻബി), ഇന്ത്യൻ ബാങ്ക്, ബാങ്ക് ഓഫ് ബറോഡ (ബിഒബി) തുടങ്ങിയ ബാങ്കുകളാണ് ഒക്ടോബർ 8 മുതൽ പ്രാബല്യത്തിൽ വരുന്ന രീതിയിൽ വായ്പാ നിരക്കുകൾ കൂട്ടിയത്.
ഏകദേശം നാല് വർഷത്തിനിടയിലെ ആദ്യ പലിശ നിരക്ക് വർദ്ധനവാണിത്. വർദ്ധിച്ചുവരുന്ന നാണയപ്പെരുപ്പവും ദുർബലമാകുന്ന രൂപയും കണക്കിലെടുത്താണ് ആർബിഐയുടെ ഈ നിർണ്ണായക നടപടി. ഗവർണർ സഞ്ജയ് മൽഹോത്രയുടെ നേതൃത്വത്തിലുള്ള ആറംഗ സമിതി ഏകകണ്ഠമായാണ് റിപ്പോ നിരക്ക് 5.50 ശതമാനമായി ഉയർത്താൻ തീരുമാനിച്ചത്. സമീപഭാവിയിൽ പലിശ നിരക്ക് കുറയ്ക്കാനുള്ള സാധ്യതകൾ തള്ളിക്കളഞ്ഞുകൊണ്ട് ആർബിഐ നയം ‘കലിബ്രേറേറ്റഡ് ടൈറ്റനിംഗിലേക്ക്’ (Calibrated Tightening) മാറ്റിയതും ശ്രദ്ധേയമാണ്.
റിപ്പോ നിരക്ക് വർദ്ധനവിനെത്തുടർന്ന് പഞ്ചാബ് നാഷണൽ ബാങ്ക് (PNB) റിപ്പോ ലിങ്ക്ഡ് ലെൻഡിംഗ് റേറ്റ് (RLLR) 8.10 ശതമാനത്തിൽ നിന്ന് 8.35 ശതമാനമാക്കി ഉയർത്തി. ഇന്ന് മുതൽ ഇത് നിലവിൽ വരും. എങ്കിലും, ബാങ്കിന്റെ മാർജിനൽ കോസ്റ്റ് ഓഫ് ലെൻഡിംഗ് റേറ്റ് (MCLR), ബേസ് റേറ്റ് എന്നിവയിൽ മാറ്റമില്ലെന്ന് ബാങ്ക് വ്യക്തമാക്കിയിട്ടുണ്ട്. ചെന്നൈ ആസ്ഥാനമായുള്ള പൊതുമേഖലാ ബാങ്കായ ഇന്ത്യൻ ബാങ്ക് തങ്ങളുടെ റെപ്പോ ലിങ്ക്ഡ് ബെഞ്ച്മാർക്ക് ലെൻഡിംഗ് റേറ്റ് (RBLR) നിലവിലുണ്ടായിരുന്ന 7.95 ശതമാനത്തിൽ നിന്ന് 8.20 ശതമാനമാക്കി മാറ്റി.
അതുപോലെ, ബാങ്ക് ഓഫ് ബറോഡ തങ്ങളുടെ റെപ്പോ അധിഷ്ഠിത വായ്പാ നിരക്ക് 7.90 ശതമാനത്തിൽ നിന്ന് 25 അടിസ്ഥാന പോയിന്റ് കൂട്ടി 8.15 ശതമാനമാക്കി. ബാങ്ക് ഓഫ് ഇന്ത്യ, ഇന്ത്യൻ ഓവർസീസ് ബാങ്ക് എന്നിവയും തങ്ങളുടെ ആർബിഎൽആർ നിരക്കുകൾ 8.35 ശതമാനമായി ഉയർത്തിയിട്ടുണ്ട്. സ്വകാര്യമേഖലാ ബാങ്കായ തമിഴ്നാട് മെർക്കന്റൈൽ ബാങ്ക് തങ്ങളുടെ ആർഎൽഎൽആർ നിരക്ക് 8.25 ശതമാനത്തിൽ നിന്ന് 8.5 ശതമാനമായി വർദ്ധിപ്പിച്ചു. ആർബിഐ തീരുമാനത്തിന്റെ പശ്ചാത്തലത്തിൽ മറ്റ് പ്രമുഖ ബാങ്കുകളും വായ്പാ പലിശ നിരക്കുകൾ വരും ദിവസങ്ങളിൽ വർദ്ധിപ്പിക്കാൻ ഇടയുണ്ട്. നിരക്കുകളിലെ ഈ വർദ്ധനവ് ഭവന, വാഹന, വ്യക്തിഗത വായ്പയെടുത്ത സാധാരണക്കാരുടെ പ്രതിമാസ തിരിച്ചടവ് (EMI) തുക ഉയരാൻ കാരണമാകും.
Following RBI’s 25 bps repo rate hike to 5.50%, major banks including PNB, Indian Bank, and BoB raised their lending rates, driving up EMI costs for borrowers.
