ഇന്ത്യ-യുകെ സ്വതന്ത്ര വ്യാപാര കരാറിന്റെ (FTA) പശ്ചാത്തലത്തിൽ അഡ്വാൻസ്ഡ് മാനുഫാക്ചറിങ്, നിർമ്മിത ബുദ്ധി (AI), സുസ്ഥിര വ്യോമയാനം, പ്രതിരോധം, ആരോഗ്യ മേഖലകളിൽ വൻതോതിൽ ഇന്ത്യൻ നിക്ഷേപം ആകർഷിക്കാൻ ബ്രിട്ടനിലെ സൗത്ത് യോർക്ക്ഷെയർ നീക്കം ആരംഭിച്ചു. ഇന്ത്യ-യുകെ ജോയിന്റ് ഇക്കണോമിക് ആൻഡ് ട്രേഡ് കമ്മിറ്റിയുടെ (JETCO) 16-ാമത് യോഗത്തിൽ പങ്കെടുക്കവെ സൗത്ത് യോർക്ക്ഷെയർ മേയർ ഒലിവർ കോപ്പാർഡ് ആണ് ഇക്കാര്യം വ്യക്തമാക്കിയത്.
ഇന്ത്യയുടെ അതിവേഗം വളരുന്ന സമ്പദ്‌വ്യവസ്ഥയും സാങ്കേതിക മികവും പ്രാദേശിക വ്യാവസായിക വളർച്ചയ്ക്ക് വലിയ കരുത്തേകുമെന്നാണ് സൗത്ത് യോർക്ക്ഷെയറിന്റെ വിലയിരുത്തൽ. ഇതിന്റെ ഭാഗമായി ഇന്ത്യൻ കമ്പനിയായ ‘രഘു വംശി’യിൽ നിന്ന് വലിയൊരു തുകയുടെ നിക്ഷേപം അടുത്തിടെ പ്രദേശത്ത് തൊഴിലവസരങ്ങൾ സൃഷ്ടിക്കാനായി സമാഹരിച്ചിരുന്നു. കൂടാതെ, ഉടൻ പ്രവർത്തനം പുനരാരംഭിക്കുന്ന ഡോൺകാസ്റ്റർ ഷെഫീൽഡ് വിമാനത്താവളത്തിൽ ഹരിത വ്യോമയാന സാങ്കേതികവിദ്യ വികസിപ്പിക്കുന്നതിനും പുതിയ റൂട്ടുകൾ ആരംഭിക്കുന്നതിനും ഇന്ത്യൻ നിക്ഷേപകരുമായി സഹകരിക്കാൻ താൽപ്പര്യം പ്രകടിപ്പിച്ചിട്ടുണ്ട്. വടക്കൻ ഇംഗ്ലണ്ടിലെ വിവിധ മേഖലകളിലായി ഏകദേശം 400 മില്യൺ പൗണ്ടിന്റെ (ഏകദേശം 4,300 കോടി രൂപ) നിക്ഷേപ സാധ്യതകളാണ് ഇന്ത്യക്കായി സൗത്ത് യോർക്ക്ഷെയർ മുന്നോട്ടുവെക്കുന്നത്.
South Yorkshire targets Indian investments in advanced manufacturing, AI, and aviation following the UK-India FTA, presenting £400 million in regional opportunities.
