നോർവീജിയൻ കമ്പനിയായ വിൽസൺ എ.എസ്.എയ്ക്കായി ഉഡുപ്പി കൊച്ചിൻ ഷിപ്പ്‌യാർഡ് ലിമിറ്റഡ് (UCSL) നിർമ്മിക്കുന്ന എട്ട് ഡ്രൈ കാർഗോ കപ്പലുകളിൽ ആദ്യത്തേത് ഉഡുപ്പി മാൽപെയിലെ ഷിപ്പ്‌യാർഡിൽ നീറ്റിലിറക്കി. 6,300 ഡി.ഡബ്ല്യു.ടി (ഡെഡ്‌വെയ്റ്റ് ടണ്ണേജ്) ശേഷിയുള്ള ഈ കപ്പൽ 2021-ൽ സ്ഥാപിതമായ ശേഷം ഷിപ്പ്‌യാർഡ് നിർമ്മിക്കുന്ന ഏറ്റവും വലുതാണ്. ഇതോടൊപ്പം പദ്ധതിയിലെ മൂന്നാമത്തെ കപ്പലിന്റെ കീൽ ലേയിങ്ങും നാലാമത്തെ കപ്പലിന്റെ നിർമ്മാണത്തിനായുള്ള സ്റ്റീൽ കട്ടിംഗും ചടങ്ങിൽ നിർവ്വഹിച്ചു.
99 മീറ്റർ നീളവും 15.85 മീറ്റർ വീതിയുമുള്ള ഈ കപ്പലിന് 3,16,278 ക്യുബിക് ഫീറ്റ് ചരക്ക് സംഭരണ ശേഷിയുണ്ട്. നെതർലൻഡ്സ് ആസ്ഥാനമായ കോണോഷിപ്പ് ഇന്റർനാഷണൽ ബി.വി രൂപകൽപ്പന ചെയ്ത ഈ ആധുനിക ചരക്കുകപ്പൽ ഇന്ധനക്ഷമത ഉറപ്പാക്കുന്നതിനും പ്രവർത്തനച്ചെലവും പരിസ്ഥിതി ആഘാതവും കുറയ്ക്കുന്നതിനും മുൻഗണന നൽകുന്നു. 2024 ജൂണിലാണ് എട്ട് കപ്പലുകൾക്കായുള്ള കരാർ ഒപ്പിട്ടത്. ആദ്യ കപ്പൽ 2026 ഡിസംബറിൽ കൈമാറാനാണ് ലക്ഷ്യമിടുന്നത്. ഇതിനുമുമ്പ്, വിൽസൺ എ.എസ്.എയ്ക്കായി 89 മീറ്റർ നീളമുള്ള ആറ് 3,800 ഡി.ഡബ്ല്യു.ടി കപ്പലുകൾ റെക്കോർഡ് വേഗതയിൽ നിർമ്മിച്ച് നൽകാൻ യു.സി.എസ്.എല്ലിന് സാധിച്ചിരുന്നു.
Udupi Cochin Shipyard Limited (UCSL) has launched a 6,300 DWT dry cargo vessel built for Norwegian firm Wilson ASA at its Malpe facility.
