സൊമാറ്റോ സഹസ്ഥാപകൻ ദീപീന്ദർ ഗോയൽ വികസിപ്പിച്ചെടുത്ത ബ്രെയിൻ-ഹെൽത്ത് വെയറബിൾ ഉപകരണമായ ‘ടെമ്പിളി’ന്റെ (Temple) വിലയെയും സാങ്കേതിക അവകാശവാദങ്ങളെയും ചൊല്ലിയുള്ള വിവാദങ്ങളിൽ പ്രതികരണവുമായി ദീപീന്ദർ ഗോയൽ. 85,000 രൂപയോളമുള്ള ഉയർന്ന വിലയും ‘ബ്രെയിൻ ഫ്ലോ’ പോലുള്ള ഫീച്ചറുകളെക്കുറിച്ചുള്ള അവകാശവാദങ്ങളും വലിയ ചർച്ചയായ പശ്ചാത്തലത്തിലാണ് വിശദീകരണവുമായി അദ്ദേഹം രംഗത്തെത്തിയത്. ടെമ്പിൾ പ്രധാനമായും അന്താരാഷ്ട്ര വിപണിയെ ലക്ഷ്യമിട്ട് നിർമ്മിച്ചതാണെന്നും ഇന്ത്യയിൽ നിന്ന് കേവലം ഒരു ശതമാനത്തിൽ താഴെ വിൽപന മാത്രമാണ് കമ്പനി പ്രതീക്ഷിക്കുന്നതെന്നും ദീപീന്ദർ ഗോയൽ വ്യക്തമാക്കി.
തീവ്രമായ ഗവേഷണത്തിനും വികസനത്തിനും ശേഷമാണ് ഈ ഉൽപ്പന്നം പുറത്തിറക്കിയതെന്നും അതിനനുസരിച്ചാണ് വില നിശ്ചയിച്ചിട്ടുള്ളതെന്നും അദ്ദേഹം കുറിച്ചു. ടെമ്പിൾ ഒരു വൈദ്യശാസ്ത്ര ഉപകരണമല്ലെന്നും രോഗങ്ങൾ കണ്ടെത്താനോ ചികിത്സിക്കാനോ ഉള്ളതല്ലെന്നും വ്യക്തമാക്കിയ അദ്ദേഹം, ഇതൊരു ഫിറ്റ്നസ് എ.ഐ ഉപകരണം മാത്രമാണെന്ന് ഓർമ്മിപ്പിച്ചു. കേവലം ഒരു ഇന്ത്യൻ സ്റ്റാർട്ടപ്പ് ഉൽപ്പന്നം എന്നതിനേക്കാൾ ആഗോളതലത്തിൽ മത്സരിക്കാനാണ് കമ്പനി ആഗ്രഹിക്കുന്നതെന്നും, സോഷ്യൽ മീഡിയ വിമർശനങ്ങൾക്ക് ഉപരി വരും ദിവസങ്ങളിൽ കൃത്യമായ ശാസ്ത്രീയ പഠന റിപ്പോർട്ടുകൾ പുറത്തുവിടുമെന്നും ഗോയൽ കൂട്ടിച്ചേർത്തു.
Deepinder Goyal says Temple is a global fitness AI wearable, not a medical device, as its ₹85,000 price and brain-health claims face scrutiny.
