24,713 കോടി രൂപയുടെ ഇടപാടിൽ ഫ്യൂച്ചർ റീട്ടെയിലിന്റെ മൊത്തത്തിലുള്ള ആസ്തികൾ റിലയൻസ് ഇൻഡസ്ട്രീസിന്  വിൽക്കാനുള്ള ഫ്യൂച്ചറിന്റെ പദ്ധതിയാണ് ഒരു വർഷത്തിലേറെയായി, ആമസോണിന്റെ നിയമപോരാട്ടത്തിൽ കുടുങ്ങി കിടക്കുന്നത്.  ആമസോണും ഫ്യൂച്ചറും ഇന്ത്യയിലെയും സിംഗപ്പൂരിലെയും നിരവധി കോടതികളിലും ഫോറങ്ങളിലും പരസ്പരം പോരടിക്കുകയാണ്. റിലയൻസുമായുളള ഇടപാട്, മുൻപ് ഫ്യൂച്ചർ ഗ്രൂപ്പ് ആമസോണുമായി ഒപ്പുവെച്ച നിക്ഷേപ കരാറിന്റെ ലംഘനമാണെന്ന് ആമസോൺ അവകാശപ്പെടുന്നു. നിയമപരമായ വിലക്കുണ്ടായിട്ടും റിലയൻസ് ഇൻഡസ്ട്രീസിന് ആസ്തികൾ കൈമാറാൻ അനുവദിച്ചതിന് ഫ്യൂച്ചറിനെതിരെ ആമസോൺ ക്രിമിനൽ നടപടിയെടുക്കാൻ സാധ്യതയുണ്ടെന്ന് ചില മാധ്യമങ്ങൾ റിപ്പോർട്ട് ചെയ്തിരുന്നു റിലയൻസ് 500 ഓളം ഫ്യൂച്ചർ സ്റ്റോറുകൾ റീബ്രാൻഡ് ചെയ്ത് റിലയൻസ് ഏറ്റെടുത്തതായി റിപ്പോർട്ട് വന്നിരുന്നു. ഇത്തരമൊരു കേസുമായി മുന്നോട്ട് പോകരുതെന്ന് ആമസോണിനോട് ആവശ്യപ്പെടാൻ ഫ്യുച്ചറിന്റെ അഭിഭാഷകനായ ഹരീഷ് സാൽവെ കോടതിയോട് ആവശ്യപ്പെട്ടിരുന്നു. വാർത്താ റിപ്പോർട്ട് തെറ്റാണെന്നും അത്തരം ക്രിമിനൽ നടപടികളൊന്നും തുടരില്ലെന്നും ആമസോൺ അഭിഭാഷകനും വ്യക്തമാക്കി.