പല്ല് തേയ്ക്കാന്‍ മലയാളികള്‍ ഉപയോഗിക്കുന്ന ഉമിക്കരിയുമായി എത്തി പ്രധാനമന്ത്രി നരേന്ദ്രമോദിയെ അതിശയിപ്പിച്ച സംരംഭകന്‍. കണ്ണൂരില്‍ നിന്നുളള സിജേഷ് പൊയ്യില്‍ എന്ന സംരംഭകനാണ് പ്രധാനമന്ത്രിക്കും കൗതുകമായി മാറിയത്. മുദ്ര ലോണ്‍ പ്രയോജനപ്പെടുത്തി വിജയകരമായി സംരംഭങ്ങള്‍ കെട്ടിപ്പടുത്തവരുമായി നടത്തിയ കൂടിക്കാഴ്ചയ്ക്കിടെയാണ് സിജേഷിനെ പ്രധാനമന്ത്രി പരിചയപ്പെട്ടത്. സിജേഷുമായുളള കൂടിക്കാഴ്ച ചിത്രം സഹിതം പ്രധാനമന്ത്രി ട്വീറ്റ് ചെയ്യുകയും ചെയ്തു.
എട്ട് വര്‍ഷത്തോളം പ്രവാസിയായിരുന്ന സിജേഷ് തിരിച്ചെത്തിയ ശേഷമാണ് മുദ്ര ലോണിലൂടെ 8.55 ലക്ഷം രൂപ വായ്പയെടുത്ത് സംരംഭം തുടങ്ങിയത്. ഉമിക്കരി കൂടാതെ പ്രകൃതിദത്തമായ ഫെയ്‌സ്പാക്കുകളും തേന്‍, പയറുപൊടി പോലുളള ഉല്‍പ്പന്നങ്ങളും സിജേഷിന്റെ നേതൃത്വത്തിലുളള ശാന്തിസ് ബ്രാന്‍ഡില്‍ നിന്ന് വിപണിയില്‍ എത്തുന്നുണ്ട്.
പ്രധാനമന്ത്രിയുമായുളള കൂടിക്കാഴ്ചയ്ക്ക് മുന്‍പ് ഉപരാഷ്ട്രപതി വെങ്കയ്യ നായിഡുവുമായും സിജേഷും മറ്റ് സംരംഭകരും കൂടിക്കാഴ്ച നടത്തിയിരുന്നു. സിജേഷിന്റെ ഉമിക്കരി പ്രൊഡക്ട് അതിശയത്തോടെയാണ് അദ്ദേഹവും നോക്കിക്കണ്ടത്.
