റിസർവ്വ് ബാങ്ക് രാജ്യത്ത് ഡിജിറ്റൽ കറൻസി (CBDC) അവതരിപ്പിക്കുമെന്ന് ധനമന്ത്രി നിർമല സീതാരാമൻ ബജറ്റിൽ പ്രഖ്യാപിച്ചു കഴി‍ഞ്ഞു. ഡിജിറ്റൽ രൂപ ബ്ലോക്ക് ചെയിനും മറ്റ് സാങ്കേതികവിദ്യകളും ഉപയോഗിക്കുമെന്നും ബജറ്റ് പറയുന്നു. ഇന്ത്യൻ ഡിജിറ്റൽ ഇക്കോണമിയെ പരിപോഷിപ്പിക്കുന്നതിനുളള സർക്കാരിന്റെ അടുത്ത നീക്കമായാണ് ഡിജിറ്റൽ കറൻസി വിലയിരുത്തപ്പെടുന്നത്. ക്രിപ്റ്റോകറൻസികളായ ബിറ്റ്കോയിനിൽ നിന്നും ഈഥറിൽ നിന്നും പ്രചോദനം ഉൾക്കൊണ്ട് വരുന്ന ഡിജിറ്റൽ കറൻസി പക്ഷേ റിസർവ്വ് ബാങ്കിന്റെ നിയന്ത്രണത്തിലായിരിക്കും. ഇത് തന്നെയാണ് ഡിജിറ്റൽ രൂപയെ ക്രിപ്റ്റോയിൽ നിന്ന് വ്യത്യസ്തമാക്കുന്നതും. ഇന്ത്യയുടെ ഡിജിറ്റൽ കറൻസി കൂടുതൽ കാര്യക്ഷമവും ലളിതവും ആയിരിക്കും. ഇത് കറൻസി മാനേജ്മെന്റിന് എളുപ്പമാവുമെന്നും ധനമന്ത്രി ബജറ്റിൽ സൂചിപ്പിച്ചിരുന്നു. എന്താണ് മറ്റു ക്രിപ്റ്റോകറൻസികളിൽ നിന്നും ഇന്ത്യയുടെ ഡിജിറ്റൽ രൂപയെ വ്യത്യസ്തമാക്കുന്നതെന്ന് നോക്കാം.