ഇതിഹാസ ഗായകൻ കിഷോർ കുമാറിന്റെ പഴയ ബംഗ്ലാവ് ‘Gouri Kunj’ ഒരു ഗംഭീര റെസ്റ്റോറന്റാക്കി മാറ്റിയിരിക്കുകയാണ് ഇന്ത്യൻ ക്രിക്കറ്റ് താരം വിരാട് കോഹ്ലി.
- ‘ഗൗരികുഞ്ച്’ ഇനി ‘One8 Commune’ എന്നറിയപ്പെടും. അടുത്തിടെയാണ് കോഹ്ലി മുംബൈയിലെ ജുഹുവിൽ വൺ8 കമ്യൂണിന്റെ പുതിയ ഔട്ട്ലെറ്റ് തുറന്നത്.
- 19.24 കോടി രൂപ വിലമതിക്കുന്ന ബംഗ്ലാവിന്റെ ഒരു ഭാഗമാണ് റസ്റ്റോറന്റാക്കി മാറ്റിയിരിക്കുന്നത്.
- അഞ്ച് വർഷത്തേക്ക് ലീസിനാണ് ബംഗ്ലാവ് എടുത്തിരിക്കുന്നത്.
‘വൺ8 കമ്മ്യൂൺ’ യൂട്യൂബ് ചാനലിൽ പുറത്തിറക്കിയ വീഡിയോയിൽ, നടനും അവതാരകനുമായ മനീഷ് പോളിനൊപ്പം കോഹ്ലി റസ്റ്റോറന്റ് വിശേഷങ്ങൾ പങ്കുവയ്ക്കുന്നു. വീണ്ടും വന്നാൽ ഒരിക്കൽ കൂടി വരാൻ ഉപഭോക്താക്കളെ ആകർഷിക്കുക എന്ന ലക്ഷ്യത്തോടെയാണ് ഭക്ഷണത്തിന് ഏറ്റവും പ്രാധാന്യം നൽകുന്നതെന്ന് വിരാട് കോഹ്ലി പറഞ്ഞു. എന്തു കൊണ്ട് ഗൗരി കുഞ്ച് തിരഞ്ഞെടുത്തു എന്ന ചോദ്യത്തിന് താൻ കിഷോർ കുമാറിന്റെ വലിയ ആരാധകനാണെന്നു പറഞ്ഞ കോഹ്ലി കിഷോർ കുമാറിന്റെ “മേരെ മെഹബൂബ് ഖയാമത്ത് ഹോഗി” എന്ന ജനപ്രിയ ഗാനത്തിൽ നിന്നുളള വരികളും ആലപിച്ചു.
ഹോസ്പിറ്റാലിറ്റി ബിസിനസിൽ കോഹ്ലി കാലെടുത്തുവയ്ക്കുന്നത് ഇതാദ്യമല്ല. കാരണം One8 Commune എന്ന പേരിൽ റെസ്റ്റോറന്റുകളുടെ ഒരു ശൃംഖല തന്നെ കോഹ്ലിക്ക് സ്വന്തമായുണ്ട്. ഡൽഹി, കൊൽക്കത്ത, പൂനെ എന്നിവിടങ്ങളിലാണ് ഔട്ട്ലെറ്റുകൾ. സ്വന്തം ഫാഷൻ ഇ-കൊമേഴ്സ് സ്റ്റാർട്ടപ്പായ “Wrogn”, ഫിറ്റ്നസ് സെന്റർ ചെയിൻ “Chisel” എന്നിവയും ക്രിക്കറ്റിന് പുറമേയുളള കോഹ്ലിയുടെ സംഭാവനയാണ്. ഇതിനൊപ്പം മുൻ ഇന്ത്യൻ ക്യാപ്റ്റന് വസ്ത്രങ്ങൾ, സുഗന്ധദ്രവ്യങ്ങൾ, ഷൂകൾ തുടങ്ങി വിവിധ തരത്തിലുളള ബിസിനസുകളിലും സ്റ്റാർട്ടപ്പുകളിലും നിക്ഷേപമുണ്ട്.
