വിക്രമിന് പിന്നാലെ ഇനി ആരൊക്കെ പറക്കും?

ഇന്ത്യയുടെ ബഹിരാകാശരംഗത്തെ ISROയുടെ കുത്തക അവസാനിപ്പിക്കുകയാണ് ഒരു തരത്തിൽ ബഹിരാകാശ രംഗത്തെ സ്വകാര്യസ്റ്റാർട്ടപ്പുകൾ. സ്വകാര്യമേഖലയുടെ കടന്നുവരവ് രാജ്യത്തിന്റെ ബഹിരാകാശ സമ്പദ്‌വ്യവസ്ഥയെ വിശാലമാക്കും.

സർക്കാർ കണക്കുകൾ പ്രകാരം, ഇന്ത്യൻ ബഹിരാകാശ വ്യവസായത്തിന്റെ മൂല്യം 2019-ൽ 7 ബില്യൺ ഡോളറായിരുന്നു, എന്നാൽ 2024-ഓടെ 50 ബില്യൺ ഡോളറായി വളരാനുള്ള സാധ്യതയുണ്ട്.

ഇതൊരു തുടക്കം മാത്രം

ഇന്ത്യൻ ബഹിരാകാശ പരിപാടിയുടെ പിതാവായ വിക്രം സാരാഭായിക്ക് ആദരവായി വിക്രം-എസ് എന്ന് നാമകരണം ചെയ്ത റോക്കറ്റ് ബഹിരാകാശ പര്യവേക്ഷണത്തിൽ സ്വകാര്യമേഖലയുടെ ഉദയം അടയാളപ്പെടുത്തുന്നു.

ഇന്ത്യയിലെ ഏറ്റവും വലിയ സ്വകാര്യ ബഹിരാകാശ സ്റ്റാർട്ടപ്പായ സ്കൈറൂട്ട് എയ്‌റോസ്‌പേസ് ഒരു പുതിയ തുടക്കത്തിന്റെ പ്രതീകമായി, ദൗത്യത്തിന് ‘Prarambh‘ എന്നാണ് പേരിട്ടത്. നാല് വർഷമായി എയ്റോസ്പേസ് രംഗത്ത് പ്രവർത്തിക്കുന്ന സ്റ്റാർട്ടപ്പാണ് സ്‌കൈറൂട്ട് എയ്‌റോസ്‌പേസ്.

മുൻ ഇസ്രോ ശാസ്ത്രജ്ഞരായ പവൻ കുമാർ ചന്ദനയും നാഗ ഭാരത് ഡാകയും ചേർന്ന് 2018 ജൂണിലാണ് സ്റ്റാർട്ടപ്പ് സ്ഥാപിച്ചത്. ഐഎസ്ആർഒയുമായി ധാരണാപത്രം ഒപ്പുവച്ച ആദ്യ സ്റ്റാർട്ടപ്പാണ് സ്കൈറൂട്ട് എയറോസ്പേസ്. സ്‌കൈറൂട്ടിന്റെ വിജയം മറ്റ് കമ്പനികൾക്ക് ബഹിരാകാശ മേഖലയിലേക്ക് പ്രവേശിക്കാൻ ഒരു സഹായവും നൽകും. ഇത് പ്രതിരോധ സംവിധാനങ്ങളും നിർമ്മാണവും വർദ്ധിപ്പിക്കും.

ബഹിരാകാശം സ്വകാര്യമേഖലയ്ക്കും

2020-ലാണ് കേന്ദ്രസർക്കാർ ബഹിരാകാശമേഖല സ്വകാര്യ കമ്പനികൾക്കായി തുറന്നുകൊടുത്തത്. ബഹിരാകാശ മേഖലയിൽ സ്വകാര്യ പങ്കാളിത്തം വർദ്ധിപ്പിക്കുന്നതിനുള്ള പരിഷ്കാരങ്ങളുടെ ഭാഗമായി 2020 ജൂണിൽ സർക്കാർ IN-SPAce എന്ന പുതിയ സ്ഥാപനം പ്രഖ്യാപിച്ചു. ബഹിരാകാശ സാങ്കേതികവിദ്യയുടെ വ്യാപനം വർദ്ധിപ്പിക്കുന്നതിനും രാജ്യത്തിനുള്ളിൽ ബഹിരാകാശ സമ്പദ്‌വ്യവസ്ഥ ഉയർത്തുന്നതിനും, ബഹിരാകാശ പ്രവർത്തനങ്ങളിൽ സ്വകാര്യ കമ്പനികളുടെ പങ്കാളിത്തം കേന്ദ്രം പ്രോത്സാഹിപ്പിക്കുന്നു. ഇന്ത്യയിലെ ബഹിരാകാശരംഗത്ത് വളരെക്കാലമായി ചെറിയ തോതിലെങ്കിലും സ്വകാര്യ മേഖലകളുടെ പങ്കാളിത്തമുണ്ട്. റോക്കറ്റുകളുടെയും ഉപഗ്രഹങ്ങളുടെയും നിർമ്മാണത്തിന്റെ വലിയൊരു ഭാഗം സ്വകാര്യമേഖലയിലാണ് നടക്കുന്നത്. ഗവേഷണ സ്ഥാപനങ്ങളുടെ പങ്കാളിത്തവും വർധിച്ചുവരികയാണ്. നിലവിൽ, 80% പോളാർ സാറ്റലൈറ്റ് വിക്ഷേപണ വാഹനങ്ങളും (PSLV) ഐഎസ്ആർഒയുടെയോ അല്ലെങ്കിൽ ഡിഫൻസ് റിസർച്ച് ഡെവലപ്‌മെന്റ് ഓർഗനൈസേഷന്റെയോ (DRDO) നിർമ്മാണ പരിപാടികൾക്ക് കീഴിൽ പ്രാദേശികമായാണ് നിർമ്മിക്കുന്നത്.

എല്ലാ സഹായവും നൽകാൻ ISRO

അതിവേഗം വളരുന്ന ആഗോള ബഹിരാകാശ സമ്പദ്‌വ്യവസ്ഥയിൽ ഇന്ത്യൻ ബഹിരാകാശ വ്യവസായത്തിന് വെറും 3% വിഹിതമേ ഉണ്ടായിരുന്നുള്ളൂ. ഈ വിപണിയുടെ 2% മാത്രമാണ് റോക്കറ്റ്, ഉപഗ്രഹ വിക്ഷേപണ സേവനങ്ങൾക്കുള്ളത്, ഇതിന് സാമാന്യം വലിയ അടിസ്ഥാന സൗകര്യങ്ങളും കനത്ത നിക്ഷേപവും ആവശ്യമാണ്. ബാക്കിയുള്ള 95% സാറ്റലൈറ്റ് അധിഷ്‌ഠിത സേവനങ്ങളുമായും ഭൂഗർഭ അധിഷ്‌ഠിത സംവിധാനങ്ങളുമായും ബന്ധപ്പെട്ടിരിക്കുന്നു. അതിനാൽ, വികസിച്ചുകൊണ്ടിരിക്കുന്ന ബഹിരാകാശ മേഖലയുടെ ആവശ്യകതയും സ്വകാര്യ മേഖലയിലെ സ്റ്റാർട്ടപ്പുകളുടെ സന്നദ്ധതയും ഈ ആശയത്തിന് പ്രോത്സാഹനം നൽകി. നിരവധി ഇന്ത്യൻ കമ്പനികൾ ബഹിരാകാശ രംഗത്തെ അവസരങ്ങൾ പ്രയോജനപ്പെടുത്താൻ കാത്തിരിക്കുകയാണ്. ഏതാനും കമ്പനികൾ അവരുടെ വിക്ഷേപണ വാഹനങ്ങൾ, ഉപഗ്രഹങ്ങളും മറ്റ് പേലോഡുകളും ബഹിരാകാശത്തേക്ക് കൊണ്ടുപോകുന്ന ISRO യുടെ PSLV പോലുള്ള റോക്കറ്റുകൾ, വികസിപ്പിക്കാനുള്ള പ്രക്രിയയിലാണ്. സ്വകാര്യ കമ്പനികൾക്ക് അതിന്റെ എല്ലാ സൗകര്യങ്ങളും നൽകാനും ഐഎസ്ആർഒ തയ്യാറാണ്. ശ്രീഹരിക്കോട്ട വിക്ഷേപണ നിലയത്തിനുള്ളിൽ സ്വകാര്യ കമ്പനികൾക്ക് അവരുടെ ലോഞ്ച്പാഡ് നിർമ്മിക്കാം, അതിനാവശ്യമായ സ്ഥലം ഐഎസ്ആർഒ നൽകും.

നാസയെ വെല്ലാൻ ISRO

നാസ പോലുള്ള മറ്റ് വൻ ബഹിരാകാശ ഏജൻസികളുമായി മത്സരിക്കുന്നതിന് ആവശ്യമായ വേഗതയും ഉത്തേജനവും ഇന്ത്യൻ ബഹിരാകാശ മേഖലയ്ക്ക് നൽകാൻ സ്വകാര്യ പങ്കാളിത്തം സഹായിക്കും.

ശാസ്ത്രം, ഗവേഷണം, വികസനം, ഗ്രഹാന്തര പര്യവേക്ഷണം, തന്ത്രപരമായ വിക്ഷേപണങ്ങൾ എന്നിവയിൽ ശ്രദ്ധ കേന്ദ്രീകരിക്കാൻ ഐഎസ്ആർഒയ്ക്ക് സമയം ലഭിക്കും. സ്വകാര്യ കമ്പനികൾക്ക് പതിവ്, വാണിജ്യ വിക്ഷേപണങ്ങൾ, കാലാവസ്ഥ, വാർത്താവിനിമയ ഉപഗ്രഹങ്ങൾ എന്നിവ വിക്ഷേപിക്കാനാകും. സൂര്യനെ നിരീക്ഷിക്കാനുള്ള ദൗത്യം, ചന്ദ്രനിലേക്കുള്ള ദൗത്യം, മനുഷ്യ ബഹിരാകാശ യാത്ര, മനുഷ്യന്റെ ചാന്ദ്രപ്രവേശം എന്നിവ ഉൾപ്പെടെ, വരും വർഷങ്ങളിൽ നിരവധി ബഹിരാകാശ ദൗത്യങ്ങൾ ഇന്ത്യയുടെ മുന്നിലുണ്ട്. ഇതെല്ലാം നേടുന്നതിന് ISRO യ്ക്ക് സ്വകാര്യ മേഖലയുടെ സഹായവും ബാക്കപ്പും ആവശ്യമാണ്. കൂടാതെ ഐഎസ്ആർഒയ്ക്ക് സ്റ്റാർട്ടപ്പുകളുടെ സാങ്കേതികവിദ്യയും ഡാറ്റയും നേടാനാകും. ഭാവിയിലെ പദ്ധതികളിൽ നിന്നുളള സാമ്പത്തിക നേട്ടങ്ങൾ വളരെ വലുതാണ്, അത് സ്വകാര്യ മേഖലയ്ക്കും ഐഎസ്ആർഒയ്ക്കും പങ്കിടാനാകും.