2047ഓടെ ഇന്ത്യയെ വികസിത രാജ്യമാക്കി മാറ്റേണ്ടത് സർക്കാരിന്റെ ഉത്തരവാദിത്തമാണെന്ന് വൈബ്രന്റ് ഗുജറാത്ത് അന്താരാഷ്ട്ര ഉച്ചകോടിയിൽ പ്രധാനമന്ത്രി നരേന്ദ്ര മോദി. പത്താമത് വൈബ്രന്റ് ഗുജറാത്ത് അന്താരാഷ്ട്ര ഉച്ചകോടി പ്രധാനമന്ത്രി ഉദ്ഘാടനം ചെയ്തു. ഏതാനും വർഷങ്ങൾ കൊണ്ട് ലോകത്തെ ഏറ്റവും വലിയ മൂന്ന് സമ്പദ് ഘടനകളിലൊന്നായി ഇന്ത്യ മാറുമെന്ന് പ്രധാനമന്ത്രി പറഞ്ഞു.
ഗാന്ധി നഗറിൽ സംഘടിപ്പിക്കുന്ന ഉച്ചകോടിയിൽ യുഎഇ പ്രസി‍ഡന്റ് മുഹമ്മദ് ബിൻ സെയ്ദ് അൽ നഹ്യാൻ തുടങ്ങി നിരവധി ലോക നേതാക്കളാണ് പങ്കെടുക്കുന്നത്. മുഹമ്മദ് ബിൻ സെയ്ദ് അൽ നഹ്യാന്റെ സാന്നിധ്യം ഇന്ത്യയും യുഎഇയും തമ്മിലുള്ള ബന്ധം ദൃഡമാക്കുന്നതിന് സഹായിക്കും. വരാനിരിക്കുന്ന 25 വർഷം ഇന്ത്യയെ സംബന്ധിച്ച് അമൃതകാലമാണ്. 25 വർഷം കഴിഞ്ഞാൽ സ്വാതന്ത്ര്യത്തിന്റെ നൂറാം വാർഷികം ആഘോഷിക്കാം. അതിനുള്ളിൽ ഇന്ത്യയെ വികസിത രാജ്യമാക്കി മാറ്റണമെന്ന് പ്രധാനമന്ത്രി പറഞ്ഞു.
നിക്ഷേപം ആകർഷിച്ച് സ്റ്റാർട്ടപ്പുകൾ
രാജ്യത്ത് വളർന്നു വരുന്ന സ്റ്റാർട്ടപ്പ് സംസ്കാരത്തെ കുറിച്ചും പ്രധാനമന്ത്രി ഉച്ചകോടിയിൽ സംസാരിച്ചു. രാജ്യത്ത് ഒരു ലക്ഷത്തോളം സ്റ്റാർട്ടപ്പുകളുണ്ടെന്ന് പ്രധാനമന്ത്രി പറഞ്ഞു. ശതകോടികളുടെ നിക്ഷേപങ്ങളാണ് ഇന്ത്യൻ സ്റ്റാർട്ടപ്പുകളിലെത്തുന്നത്.
ഭാവിയിലേക്കുള്ള കവാടമെന്ന പ്രമേയത്തിൽ ഈ മാസം 12 വരെയാണ് വൈബ്രന്റ് ഗുജറാത്ത് നടക്കുന്നത്. പ്രധാനമന്ത്രി നരേന്ദ്ര മോദി ഗുജറാത്ത് മുഖ്യമന്ത്രിയായിരുന്ന കാലത്താണ് വൈബ്രന്റ് ഗുജറാത്ത് ഉച്ചകോടിക്ക് തുടക്കമിടുന്നത്. 34 രാജ്യങ്ങളും 16 സംഘടനകളും വൈബ്രന്റ് ഉച്ചകോടിയുടെ ഭാഗമാണ്.
ഹരിത ഊർജത്തിൽ ശ്രദ്ധ
സുസുക്കിയുടെ തോഷിഹീറോ സുസുക്കി, എപി മൊള്ളേഴ്സിന്റെ കെയ്ത്ത് സ്വൻഡഡ്സൺ, മൈക്രോൺ ടെക്നോളജിയുടെ സഞ്ജയ് മെഹ്റോത്ര, രസ്നയുടെ പിറുസ് കംബാട്ട, ഗൗതം അദാനി, മുകേഷ് അംബാനി, നടരാജൻ ചന്ദ്രശേഖരൻ തുടങ്ങി നിരവധി പേർ പങ്കെടുക്കുന്നുണ്ട്. ഗുജറാത്തിൽ നിക്ഷേപം നടത്താൻ അമേരിക്കയിൽ നിന്നടക്കം നിരവധി കമ്പനികൾ തയ്യാറായി മുന്നോട്ടു വന്നിട്ടുണ്ട്.
ഹരിത ഊർജത്തിലേക്കുള്ള വൻകിട കമ്പനികളുടെ മാറ്റം വൈബ്രന്റ് ഗുജറാത്തിൽ ദൃശ്യമായിരുന്നു. രണ്ട് ലക്ഷം കോടി രൂപയാണ് ഹരിത ഊർജത്തിനായി ഗൗതം അദാനി ഗുജറാത്തിൽ നിക്ഷേപിക്കാൻ പോകുന്നത്. സെമികണ്ടക്ടർ ഫാക്ടറി നിർമിക്കാൻ ടാറ്റയും പദ്ധതിയിടുന്നുണ്ട്. രണ്ടാമത്തെ നിർമാണ യൂണിറ്റ് ആരംഭിക്കാൻ മാരുതി ഗുജറാത്തിൽ 35,000 കോടി രൂപയുടെ നിക്ഷേപം നടത്തി. രാജ്യത്തെ ആദ്യത്തെ ഫൈബർ ഫെസിലിറ്റി കേന്ദ്രം ഗുജറാത്തിൽ പണിയാൻ റിലയൻസ് മുന്നോട്ടു വന്നിട്ടുണ്ട്.
Prime Minister Narendra Modi Vibrant Gujarat Global Summit 2024 in Gandhinagar said that it is the responsibility of the government that India should be a developed nation by 2047. On Tuesday, a bilateral meeting was held between Prime Minister Narendra Modi and United Arab Emirates President Mohamed bin Zayed Al Nahyan where several MoUs were signed. The UAE president is the chief guest at the 10th edition of the Vibrant Gujarat Global Summit (VGGS).
