ഡിഫൻഡർ വാങ്ങി മനോജ്

കുറച്ചു നാളുകൾക്ക് മുമ്പ് യുകെയിൽ വച്ച്  ടെസ്‌ല മോഡൽ 3  നടൻ മനോജ് കെ ജയൻ സ്വന്തമാക്കിയിരുന്നു. എന്നിട്ടും മനോജ് കെ ജയന്റെ വാഹന പ്രേമം തുടരുകയാണ്. ഇപ്പോളിതാ എസ്‍യുവികളിലെ പ്രധാന മോഡൽ ലാൻഡ് റോവർ ഡിഫൻഡർ കേരളത്തിൽ സ്വന്തമാക്കി അഭിമാനിക്കുകയാണ് മനോജ് കെ ജയൻ.

 ഏകദേശം ഒരു കോടി രൂപ എക്സ്ഷോറൂം വില വരുന്ന മോഡൽ  Land Rover Defender HSE (ലാൻഡ് റോവർ ഡിഫൻഡർ എ‍ച്ച്എസ്ഇ)  പെട്രോൾ മോഡല്‍  കൊച്ചിയിലാണ് താരം സ്വന്തമാക്കിയത്. പുതിയ വാഹനത്തിന്റെ ചിത്രങ്ങൾ താരം സമൂഹമാധ്യമങ്ങളിലൂടെ പങ്കുവച്ചിട്ടുണ്ട്.  

രണ്ടു ലീറ്റർ പെട്രോൾ എൻജിന് നൂറ് കിലോമീറ്റർ വേഗം കൈവരിക്കാൻ വെറും 7.4 സെക്കൻഡ് മാത്രം മതി. 221 ബിഎച്ച്പി കരുത്തും 400 എൻഎം ടോർക്കുമുണ്ട്.  191 കിലോമീറ്ററാണ് ഡിഫെൻഡറിന്റെ  പരമാവധി വേഗം. മികച്ച ഓഫ് റോഡർ ആയ ഡിഫെൻഡറിന് ഏതു പ്രതികൂല സാഹചര്യത്തിലും കുലുക്കമില്ലാത്ത യാത്രാ അനുഭവം നല്കാൻ കഴിയും.

2 ലീറ്റർ പെട്രോൾ എൻജിൻ മോ‍ഡൽ കൂടാതെ മൂന്നു ലീറ്റർ പെട്രോൾ, മൂന്നു ലീറ്റർ ഡീസൽ, അഞ്ച് ലീറ്റർ ഡീസൽ എൻജിൻ മോഡലും ഡിഫൻഡറിനുണ്ട്. ഒറിജിനൽ ലാൻഡ് റോവർ സീരിസിൽ നിന്ന് വികസിപ്പിച്ച ഡിഫൻഡർ 1983 ലാണ് പുറത്തിറങ്ങുന്നത്.   2016ൽ നിരത്തുകളിൽ നിന്നും വിടവാങ്ങിയ ഡിഫൻഡറിന്റെ പുതിയ പതിപ്പ് 2019 ൽ രാജ്യാന്തര വിപണിയിൽ എത്തി. ‌‌

പഴയ ഡിഫൻഡറിന്റെ സവിശേഷതകൾ നഷ്ടപ്പെടാതെയും ആധുനിക സൗകര്യങ്ങൾ കൂട്ടിയിണക്കിയുമെത്തിയ പുതിയ ഡിഫൻഡറിനു കേരളത്തിലും ആരാധകർ ഏറെയാണ്.

^{Actor Manoj K Jayan adds the Land Rover Defender HSE to his collection, showcasing his love for cars. This popular SUV model is known for its powerful 2-litre petrol engine and exceptional off-road capabilities.}