സെൻട്രൽ ബോർഡ് ഓഫ് സെക്കൻഡറി എജ്യുക്കേഷൻ (സിബിഎസ്ഇ) അവരുടെ ഡിജിറ്റൽ വിദ്യാഭ്യാസം മെച്ചപ്പെടുത്തുന്നതിനുള്ള ഒരു സുപ്രധാന ചുവടുവെപ്പ് നടത്തിയിരിക്കുകയാണ്. അത്യാധുനിക വീഡിയോ റെക്കോർഡിംഗ് സ്റ്റുഡിയോ കൊണ്ടുവന്നുകൊണ്ടാണ് പുതിയ ഈ മാറ്റത്തിന് സിബിഎസ്ഇ ഒരുങ്ങുന്നത്. ആഗോളതലത്തിൽ അധ്യാപകർക്കും വിദ്യാർത്ഥികൾക്കും രക്ഷിതാക്കൾക്കും ഒരുപോലെ പഠനാനുഭവം നൽകാൻ ലക്ഷ്യമിടുന്ന ഈ സ്റ്റുഡിയോയുടെ ഉദ്ഘാടനം ഡൽഹിയിലെ സെൻ്റർ ഓഫ് എക്സലൻസിൽ നടന്നു.
![](https://channeliam.com/wp-content/uploads/2024/06/cbse-launches-advanced-video-rec-1024x576.webp)
സിബിഎസ്ഇ ചെയർമാൻ രാഹുൽ സിംഗ് ഐഎഎസ്, സിബിഎസ്ഇ സെക്രട്ടറി ഹിമാൻഷു ഗുപ്ത ഐഎഎസ്, ഡയറക്ടർ (ട്രെയിനിംഗ്) ഡോ രാം ശങ്കർ എന്നിവരുൾപ്പെടെയുള്ള പ്രമുഖർ ചടങ്ങിൽ പങ്കെടുത്തു. ചരിത്രത്തിന്റെ നാഴികക്കല്ല് ആയേക്കാവുന്ന ഈ മുഹൂർത്തത്തിന് സാക്ഷ്യം വഹിക്കാൻ ബോർഡിലെ വിവിധ വകുപ്പ് മേധാവികളും സന്നിഹിതരായിരുന്നു. ഹൈ-ഡെഫനിഷൻ ക്യാമറകൾ, നൂതന ഓഡിയോ സിസ്റ്റങ്ങൾ, ഗ്രീൻ സ്ക്രീനുകൾ, പ്രൊഫഷണൽ ലൈറ്റിംഗ് സജ്ജീകരണങ്ങൾ എന്നിവ ഉൾപ്പെടുന്നതാണ് വീഡിയോ റെക്കോർഡിങ് സ്റ്റുഡിയോ.
![](https://channeliam.com/wp-content/uploads/2024/06/CBSE-720-1024x576.webp)
ഈ അത്യാധുനിക സൗകര്യങ്ങൾ ഉപയോഗിച്ച് മികച്ച വിദ്യാഭ്യാസ വീഡിയോകൾ ഷൂട്ട് ചെയ്യാൻ കഴിയുമെന്നാണ് പ്രതീക്ഷിക്കുന്നത്. ഇങ്ങിനെ ഷൂട്ട് ചെയ്യുന്ന വിഡിയോകൾ പിഎം ഇ വിദ്യ സിബിഎസ്ഇ ഡിടിഎച്ച് ചാനലിലും മറ്റ് സിബിഎസ്ഇ ചാനലുകളിലും പോർട്ടലുകളിലും പ്രക്ഷേപണം ചെയ്യും. ഡിജിറ്റൽ വിദ്യാഭ്യാസം മെച്ചപ്പെടുത്തുന്നതിനുള്ള സിബിഎസ്ഇയുടെ പ്രതിബദ്ധതയുടെ ഭാഗമാണ് ഈ പുതിയ സംരംഭം. പുതിയ സ്റ്റുഡിയോ വൈവിധ്യമാർന്ന രീതിയിൽ പഠനം കൂടുതൽ ആക്സസ് ചെയ്യാനും വിദ്യാർത്ഥികൾക്ക് അധ്യാപകരുമായും രക്ഷിതാക്കളുമായും ഇടപഴകാനും സഹായകമാവും.
![](https://channeliam.com/wp-content/uploads/2024/06/GMAn3sqb0AAPpqd-1024x682.webp)
ആധുനിക സാങ്കേതികവിദ്യ പ്രയോജനപ്പെടുത്തുന്നതിലൂടെ, പുതിയ അധ്യാപന രീതികൾ കൊണ്ടുവരാനും വിദ്യാർത്ഥികൾക്ക് പഠന പ്രക്രിയകളെ പിന്തുണയ്ക്കുന്ന പുതിയ മാറ്റങ്ങൾ നല്കുവാനുമാണ് സിബിഎസ്ഇ ലക്ഷ്യമിടുന്നത്. ഈ പുതിയ സൗകര്യം ഉപയോഗിച്ച്, ഉയർന്ന നിലവാരമുള്ള വിദ്യാഭ്യാസ ഉള്ളടക്കം വിശാലമായ പ്രേക്ഷകർക്ക് എത്തിക്കുവാനാണ് ബോർഡ് ശ്രമിക്കുന്നത്.
CBSE inaugurates a state-of-the-art video recording studio at its Centre of Excellence in Delhi, enhancing digital education for students, teachers, and parents worldwide.