മാമ്പഴ ഉൽപാദനത്തിൽ ലോകത്ത് ഒന്നാം സ്ഥാനത്താണ് ഇന്ത്യ. 40,000 ഹെക്ടർ വിസ്തൃതിയുള്ള കോലാർ ഏറ്റവും കൂടുതൽ മാമ്പഴം വളരുന്ന ജില്ലയാണ്. എന്നാൽ ലോകത്തിലെ ഏറ്റവും വലിയ മാമ്പഴ കർഷകൻ ആരാണെന്ന് ആലോചിച്ചിട്ടുണ്ടോ? ഇന്ത്യയിലെയും ഏഷ്യയിലെയും ഏറ്റവും വലിയ ധനികനായ റിലയൻസ് ഇൻഡസ്ട്രീസ് ഉടമ മുകേഷ് അംബാനിയാണ് ലോകത്തിലെ തന്നെ ഏറ്റവും വലിയ മാമ്പഴ കർഷകൻ. ഏഷ്യയിലെ ഏറ്റവും വലിയ മാമ്പഴത്തോട്ടം മുകേഷ് അംബാനിയുടെ പേരിലാണ്. ഏറ്റവും കൂടുതൽ മാമ്പഴ കയറ്റുമതിക്കാരനും മുകേഷ് അംബാനി തന്നെ.
പെട്രോളിയം, ടെലികമ്മ്യൂണിക്കേഷൻ, റീട്ടെയിൽ എന്നിങ്ങിനെ ബിസിനസ് ലോകത്ത് വ്യാപിച്ച് കിടക്കുന്ന വിശാലമായ സാമ്രാജ്യത്തിന് പേരുകേട്ട മുകേഷ് അംബാനി, കാർഷിക മേഖലയിൽ അതിശയകരവും ശ്രദ്ധേയവുമായ വ്യക്തിമുദ്ര പതിപ്പിച്ച ആളാണ്. അദ്ദേഹത്തിൻ്റെ നേതൃത്വത്തിൽ ആണ് റിലയൻസ് ഇൻഡസ്ട്രീസ് ലിമിറ്റഡ് ലോകത്തിലെ ഏറ്റവും വലിയ മാമ്പഴ കയറ്റുമതിക്കാരായി മാറിയത്. ഒരു വ്യാവസായിക ഭീമനിൽ നിന്ന് ഒരു കർഷകനിലേക്കുള്ള ഈ പരിവർത്തനം പ്രചോദനാത്മകമാണ്.
1997-ൽ ഗുജറാത്തിലെ ജാംനഗർ റിലയൻസ് റിഫൈനറിയിൽ വൻതോതിൽ മലിനീകരണ പ്രശ്‍നം നേരിട്ടിരുന്നു. റിഫൈനറി മൂലമുണ്ടാകുന്ന വൻ മലിനീകരണത്തെക്കുറിച്ച് എന്തെങ്കിലും ചെയ്യണമെന്ന് മലിനീകരണ നിയന്ത്രണ ബോർഡുകളിൽ നിന്ന് റിലയൻസിന് മുന്നറിയിപ്പുകൾ ലഭിച്ചുകൊണ്ടേയിരുന്നു. അപ്പോഴാണ് മുകേഷ് അംബാനി ഈ പ്രശ്നത്തിന് പരിഹാരം കാണേണ്ട സമയമായെന്ന് തീരുമാനിച്ചത്. അങ്ങനെയാണ് റിഫൈനറിയുടെ സമീപത്ത് ഒരു മാമ്പഴത്തോട്ടം സ്ഥാപിക്കാൻ റിലയൻസ് തീരുമാനിച്ചത്.
റിഫൈനറിക്ക് സമീപത്തെ തരിശുനിലങ്ങൾ ഏറ്റെടുത്ത് റിലയൻസ് 600 ഏക്കറിൽ, 200 ഇനത്തിൽപ്പെട്ട ഒരു ലക്ഷത്തിലധികം മാമ്പഴ തൈകൾ വെച്ചുപിടിപ്പിച്ചു. മുകേഷ് അംബാനിയുടെ പിതാവും റിലയൻസ് ഇൻഡസ്ട്രീസ് സ്ഥാപകനുമായ ധീരുഭായ് അംബാനിയുടെ പേരിലാണ് ഈ തോട്ടമുള്ളത്. ധീരുഭായ് അംബാനി ലഖിബാഗ് അമ്രായീ എന്നാണ് മാമ്പഴ തോട്ടത്തിന്റെ പേര്. മുഗൾ ചക്രവർത്തി അക്ബർ സൃഷ്ടിച്ച മാമ്പഴത്തോട്ടത്തിൽ നിന്ന് പ്രചോദനം ഉൾക്കൊണ്ടാണ് ലഖിബാഗ് അമ്രായീ എന്ന പേരുകൂടി മുകേഷ് അംബാനി ചേർത്തത്. 1.3 ലക്ഷം മാവുകൾ ആണ് ഇവിടെയുള്ളത്.
ഉയർന്ന ലവണാംശവും വരണ്ട അവസ്ഥയും ഉയർത്തുന്ന കാർഷിക വെല്ലുവിളികളെ മറികടക്കാൻ, റിലയൻസ് നിരവധി സാങ്കേതിക കണ്ടുപിടുത്തങ്ങൾ ഈ തോട്ടത്തിൽ നടപ്പിലാക്കി. തോട്ടത്തിലേക്ക് ശുദ്ധജലം ലഭ്യമാക്കുന്നതിനായി കമ്പനി ഒരു ഡസലൈനേഷൻ പ്ലാൻ്റ് സ്ഥാപിച്ചിരുന്നു. കൂടാതെ, തോട്ടത്തിൻ്റെ വിജയം ഉറപ്പാക്കാൻ ജലസംഭരണി, ഡ്രിപ്പ് ഇറിഗേഷൻ, ഒരേസമയം വളപ്രയോഗം തുടങ്ങിയ നൂതന കാർഷിക സാങ്കേതിക വിദ്യകൾ അവിടെ നടപ്പാക്കി.
കേസർ, അൽഫോൻസോ, രത്‌ന, സിന്ധു, നീലം, അമ്രപാലി തുടങ്ങിയ ഇന്ത്യൻ ഇനങ്ങളല്ലാതെ യുഎസിലെ ഫ്ലോറിഡയിൽ നിന്നുള്ള ടോമി അറ്റ്കിൻസ്, കെന്റ്, ഇസ്രായേലിൽ നിന്നുള്ള ലില്ലി, കീറ്റ്, മായ എന്നിവയും ഈ തോട്ടത്തിലുണ്ട്. ധീരുഭായ് അംബാനി ലഖിബാഗ് അമ്രയി പ്രതിവർഷം 127 ഇനം മാമ്പഴങ്ങൾ ഉത്പാദിപ്പിക്കുന്നുണ്ട്. ഈ മാമ്പഴങ്ങളും കയറ്റുമതി ചെയ്യുകയാണ് ചെയ്യുന്നത്.
പ്രതിവർഷം ഒരു ലക്ഷം സൗജന്യ തൈകൾ വിതരണം ചെയ്യുന്നതിലൂടെയും തോട്ടത്തിൽ പരിശീലന സെഷനുകൾ നൽകുന്നതിലൂടെയും നൂതന കാർഷിക രീതികൾ സ്വീകരിക്കാൻ കമ്പനി പ്രാദേശിക കർഷകരെ പ്രോത്സാഹിപ്പിക്കുന്നുണ്ട്. ഈ സംരംഭം പ്രാദേശിക കൃഷിയെ ഉത്തേജിപ്പിക്കുക മാത്രമല്ല, പരിസ്ഥിതി സംരക്ഷണവും കമ്മ്യൂണിറ്റി വികസനവും പ്രോത്സാഹിപ്പിക്കുന്നതിൽ റിലയൻസിൻ്റെ പങ്ക് ശക്തിപ്പെടുത്തുകയും ചെയ്യുന്നു. മുകേഷ് അംബാനിയുടെ മാമ്പഴ കൃഷിയിലേക്കുള്ള ചുവടുവെപ്പ്, പുതിയ ബിസിനസ്സ് അവസരങ്ങൾ സൃഷ്ടിക്കുന്നതിനൊപ്പം പാരിസ്ഥിതിക വെല്ലുവിളികളെ അഭിമുഖീകരിക്കുന്നതിന് വ്യവസായ ഭീമന്മാർക്ക് അവരുടെ വിഭവങ്ങൾ എങ്ങനെ പ്രയോജനപ്പെടുത്താമെന്നതിൻ്റെ ഉദാഹരണമാണ്. ധീരുഭായ് അംബാനി ലഖിബാഗ് അമ്രയി, മാമ്പഴ കയറ്റുമതിയിൽ ആഗോളതലത്തിൽ അറിയപ്പെടുന്നതിൽ കാരണം ഇവയൊക്കെയാണ്.
