ടൂവീലറുകൾക്കായി ജിയോയുടെ ഡിജിറ്റൽ ക്ലസ്റ്റർ

ഇരുചക്ര വാഹന വിപണിയിൽ പുതു ചരിത്രം കുറിക്കാൻ ഒരുങ്ങി മുകേഷ് അംബാനിയുടെ ജിയോ. റിലയൻസ് ജിയോ- മിഡിയടെക് സഹകരണത്തിൽ പുതിയ ഡിജിറ്റൽ ക്ലസ്റ്റർ ഒരുങ്ങുന്നുവെന്നാണ് റിപ്പോർട്ട്. അംബാനിയുടെ പുതിയ വാഗ്ദാനം ഉപയോക്താക്കളുടെ റൈഡിംഗ് അനുഭവം വർധിപ്പിക്കുമെന്നു വിദഗ്ധർ പറയുന്നു. ഇരുചക്രവാഹനങ്ങൾക്കായി പ്രത്യേകം രൂപകൽപ്പന ചെയ്ത, ഇന്ത്യയിൽ നിർമ്മിച്ച സ്മാർട്ട് ഡിജിറ്റൽ ക്ലസ്റ്ററും, സ്മാർട്ട് മൊഡ്യൂളുമാണ് റിലയൻസ് അവതരിപ്പിക്കുന്നത്.

പുതിയ സാങ്കേതികവിദ്യ ഇലക്ട്രിക് വാഹന (ഇവി) വിപണിയെ ഗണ്യമായി പരിപോഷിപ്പിക്കുമെന്നു റിപ്പോർട്ടുകൾ കൂട്ടിച്ചേർക്കുന്നു. AOSP അധിഷ്ഠിത ഓപ്പറേറ്റിംഗ് സിസ്റ്റമായ AvniOS -ലാണ് സ്മാർട്ട് ഡിജിറ്റൽ ക്ലസ്റ്റർ പ്രവർത്തിക്കുക. നിരവധി ഫീച്ചറുകൾ ഇതിൽ ഉണ്ടാവും. തത്സമയ ഡാറ്റ അനലിറ്റിക്സ്, ഇഷ്ടാനുസൃതമാക്കാവുന്ന ഇന്റർഫേസുകൾ, വോയ്സ് തിരിച്ചറിയൽ എന്നിവ എടുത്തുപറയേണ്ട സവിശേഷതകളാണ്.

റൈഡർമാരെ അവരുടെ വാഹനങ്ങൾ സുഗമമായി നിയന്ത്രിക്കാനും, മനസിലാക്കാനും ഈ ക്ലസ്റ്റർ മൊഡ്യൂൾ അനുവദിക്കും. വെഹിക്കിൾ കൺട്രോളറുകളും, ഐഒടി പ്രാപ്തമാക്കിയ ചാർജിംഗ് ഇൻഫ്രാസ്ട്രക്ചറും സമന്വയിപ്പിച്ച്, ഇവികൾക്കായി ഒപ്റ്റിമൈസ് ചെയ്ത സ്മാർട്ട് ബാറ്ററി മാനേജ്മെന്റ് സിസ്റ്റവും സമ്പൂർണ റൈഡിംഗ് അനുഭവം ഉറപ്പാക്കും. ജിയോ ഓട്ടോമോട്ടീവ് ആപ്പ് സ്യൂട്ട് ഇരുചക്രവാഹന ഉപയോക്താക്കൾക്കായി സമഗ്രമായ ടൂളുകൾ പ്രദാനം ചെയ്യുന്ന Jio Voice Assistant, JioSaavn, JioPages, JioXploR തുടങ്ങിയ സേവനങ്ങളിലൂടെ ഈ അനുഭവം മെച്ചപ്പെടുത്തും.

ഏതൊരു സാധാരണ ഇരുചക്ര വാഹന ഉപയോക്താവിനെയും ഒരു മികച്ച മെക്കാനിക്ക് ആയി ഉയർത്തുന്നതാകും റിലയൻസിന്റെ പുതിയ ഉപകരണം. വാഹനത്തെ കൂടുതൽ ആഴത്തിൽ മനസിലാക്കാനും, പ്രശ്‌നങ്ങൾ ഒരുപിരിധിവരെ റൈഡർക്കു തന്നെ തീർപ്പാക്കാനും സാധിക്കും. മീഡിയടെക്ക് നൽകുന്ന 2 വീലർ സ്മാർട്ട് ഡിജിറ്റൽ ക്ലസ്റ്ററിലെ ജിയോ തിംഗ്സുമായുള്ള സഹകരണം ഐഒടി, ഓട്ടോമോട്ടീവ് മേഖലകളിലെ നവീകരണത്തിനുള്ള വഴി തുറക്കും.

അതിവേഗം വളരുന്ന ഇരുചക്ര വാഹന ഇവി വിപണിയിൽ യഥാർത്ഥ ഉപകരണ നിർമ്മാതാക്കൾക്ക് (OEMs) ഒരു മത്സരാധിഷ്ഠിത നേട്ടം നൽകാൻ ഈ സ്മാർട്ട് ഉപകരണം ലക്ഷ്യമിടുന്നു. ഇത് മീഡിയടെക്കിന്റെ ഏറ്റവും പുതിയ സാങ്കേതികവിദ്യകളിലേക്കും, ഒഎസ് തലത്തിൽ പ്രധാന സോഫ്റ്റ്വെയർ സവിശേഷതകളിലേക്കും നേരത്തേ പ്രവേശനം നൽകുന്നു. റിലയൻസ് ജിയോ ഡിജിറ്റൽ ക്ലസ്റ്റർ മൊഡ്യൂളിനെ പറ്റിയുള്ള കൂടുതൽ വിവരങ്ങളും, വില, സ്‌പെക് വിവരങ്ങളും ഇപ്പോൾ ലഭ്യമല്ല. അതേസമയം അധികം വൈകാതെ ഇവ വിപണികളിൽ എത്തുമെന്നു പ്രതീക്ഷിക്കുന്നു.

^{Mukesh Ambani’s Jio, in collaboration with MediaTek, is set to revolutionize the two-wheeler market with a new Smart Digital Cluster running on AvniOS. This Made-in-India technology features real-time data analytics, customizable interfaces, and voice recognition to enhance the EV riding experience.}