കേരളത്തിന് വൻ നേട്ടവുമായി വിഴിഞ്ഞം തുറമുഖം. 32.63 കോടി രൂപയാണ് 2024 ജൂലൈ 11ന് ട്രയൽ റൺ ആരംഭിച്ചതു മുതൽ സർക്കാർ ഖജനാവിലേക്ക് എത്തിയത്. ഈ കാലയളവിൽ 193 കപ്പലുകളും 3.83 ലക്ഷം ടിഇയു ചരക്കുകളും തുറമുഖം വഴി എത്തിയതായി കഴിഞ്ഞ ദിവസം തുറമുഖ മന്ത്രി വി.എൻ. വാസവൻ നിയമസഭയിൽ വ്യക്തമാക്കി.
തുറമുഖത്തിന്റെ പ്രവർത്തനങ്ങൾ വിജയകരമായി പുരോഗമിക്കുകയാണ്. ചുരുങ്ങിയ സമയത്തിനുള്ളിൽ 193 കപ്പലുകൾ തുറമുഖത്ത് എത്തി. ഏകദേശം 3.83 ലക്ഷം ഇരുപത് അടി തുല്യ യൂണിറ്റ് (TEU) കണ്ടെയ്നറുകൾ കൈകാര്യം ചെയ്തു. തുറമുഖ കൺസെഷനറി സ്ഥാപനമായ അദാനി വിഴിഞ്ഞം പ്രൈവറ്റ് പോർട്ട് ലിമിറ്റഡിനും (AVPPL) തുറമുഖ വരുമാനത്തിൽ 181 കോടി രൂപ ലഭിച്ചു. പരിസ്ഥിതി അനുമതി ലഭിച്ചുകഴിഞ്ഞാൽ വിഴിഞ്ഞം തുറമുഖത്തിന്റെ രണ്ടും മൂന്നും ഘട്ടങ്ങളിലെ നിർമാണ പ്രവർത്തനങ്ങൾ ആരംഭിക്കുമെന്നും മന്ത്രി വാസവൻ പറഞ്ഞു.
2024 ഫെബ്രുവരിയിൽ വിഴിഞ്ഞം അന്താരാഷ്ട്ര തുറമുഖത്തിന്റെ ശേഷിക്കുന്ന ഘട്ടങ്ങൾ 2028 ഡിസംബറോടെ പൂർത്തിയാക്കാൻ സർക്കാരും കൺസെഷനർ കമ്പനിയും കരാറിലെത്തി. നിർമാണ പ്രവർത്തനങ്ങൾ ആരംഭിക്കുന്നതിന് മുമ്പ് പരിസ്ഥിതി അനുമതികൾ നേടുന്നതിന് ആവശ്യമായ എല്ലാ നടപടികളും സർക്കാർ സ്വീകരിച്ചിട്ടുണ്ട്. പരിസ്ഥിതി ആഘാത പഠനങ്ങൾ നടത്തിയിട്ടുണ്ട്. 2024 ജൂൺ 19ന് ഇതു സംബന്ധിച്ച പൊതു ഹിയറിംഗ് നടത്തി. പൊതു ഹിയറിംഗിൽ ഉന്നയിച്ച ആവശ്യങ്ങളും പരാതികളും പരിഗണിച്ച ശേഷം വിശദമായ പരിസ്ഥിതി ആഘാത വിലയിരുത്തൽ റിപ്പോർട്ട് തയ്യാറാക്കിയിട്ടുണ്ടെന്നും മന്ത്രി കൂട്ടിച്ചേർത്തു.
Vizhinjam Port has generated ₹32.63 crore for Kerala since its trial run began in July 2024. With 193 ships and 3.83 lakh TEUs handled, expansion plans are underway.
