രാജ്യത്തിന്റെ സാങ്കേതിക രംഗത്ത് നിർണായക മുന്നേറ്റവുമായി കേന്ദ്ര ഗവൺമെന്റ്. ഇന്ത്യയുടെ ആദ്യ തദ്ദേശീയ 28-90എൻഎം സെമികണ്ടക്ടർ ചിപ്പ് ഈ വർഷം പുറത്തിറക്കുമെന്ന് ഐടി, ഇലക്ട്രോണിക്സ് മന്ത്രി അശ്വിനി വൈഷ്ണവ് പറഞ്ഞു. വിപണിയുടെ 60 ശതമാനവും ഉൾക്കൊള്ളുന്ന പ്രത്യേക വിഭാഗത്തെയാണ് കേന്ദ്രം ഇതിനായി ലക്ഷ്യമിട്ടതെന്ന് സിഐഐ വാർഷിക ബിസിനസ് ഉച്ചകോടിയെ അഭിസംബോധന ചെയ്തുകൊണ്ട് മന്ത്രി പറഞ്ഞു.
ചിപ്പുകളുടെ ആറ് യൂണിറ്റുകൾ നിലവിൽ നിർമ്മാണത്തിലാണ്. 2022ൽ നിർമ്മാണം ആരംഭിച്ച പദ്ധതിയുടെ ആദ്യ ഘട്ടം ഈ വർഷം പൂർത്തിയാക്കി പുറത്തിറക്കും. സെമികണ്ടക്ടറുകളുലെ ചെറിയ നാനോമീറ്റർ (nm) അളവുകൾ കൂടുതൽ ഒതുക്കമുള്ള ട്രാൻസിസ്റ്റർ ഡിസൈനുകളെ സൂചിപ്പിക്കുന്നതാണ്. ഇത് നിർമ്മാതാക്കൾക്ക് ഒരൊറ്റ ചിപ്പിൽ കൂടുതൽ ട്രാൻസിസ്റ്ററുകൾ ഘടിപ്പിക്കാൻ അനുവദിക്കുന്നതായി മന്ത്രി വ്യക്തമാക്കി.
ഓട്ടോമോട്ടീവ്, ടെലികോം, പവർ, ട്രെയിനുകൾ എന്നിവയിലാണ് 28-90 എൻഎം ചിപ്പ് പ്രധാനമായും ഉപയോഗിക്കുന്നത്. പല ഉന്നത സാമ്പത്തിക വിദഗ്ധരും ഇന്ത്യ ഈ സേവനങ്ങളിൽ ശ്രദ്ധ കേന്ദ്രീകരിക്കണമെന്ന് ആഗ്രഹിക്കുന്നതായി നിർമ്മാണ മേഖലയുടെ പ്രാധാന്യം അടിവരയിട്ടുകൊണ്ട് മന്ത്രി പറഞ്ഞു. അടുത്ത ഘട്ട വളർച്ചയ്ക്ക് നിർമ്മാണവും സേവനങ്ങളും ഒരുപോലെ പ്രധാനമാണ്. അവസരം ലഭിക്കുന്നിടത്തെല്ലാം ജോലി വർദ്ധിപ്പിക്കും. സ്വന്തമായി ഐപി, ഉൽപ്പന്നം, ഡിസൈൻ, മാനദണ്ഡങ്ങൾ എന്നിവ ഉണ്ടായിരിക്കണമെന്നും ഇതിനു കൂടുതൽ ശ്രദ്ധ നൽകുമെന്നും മന്ത്രി കൂട്ടിച്ചേർത്തു.
India is set to launch its first domestically manufactured 28-90nm semiconductor chip this year, announced IT Minister Ashwini Vaishnaw, emphasizing self-reliance in tech, AI development, and railway advancements.
