ടർക്കിഷ് കമ്പനിയായ സെലിബിയുമായുള്ള (Çelebi Airport Services) സഹകരണം അവസാനിപ്പിച്ചതിന് പിന്നാലെ എയർപോർട് ഗ്രൗണ്ട് ഹാൻഡ്ലിങ് രംഗത്തേക്ക് കടക്കാൻ അദാനി എയർപോർട് ഹോൾഡിങ്സ് ലിമിറ്റഡ് (AAHL). മുംബൈ, അഹമ്മദാബാദ് വിമാനത്താവളങ്ങളിലെ ഗ്രൗണ്ട് ഹാൻഡ്ലിങ് രംഗത്തേക്ക് കടക്കാൻ അദാനി ഗ്രൂപ്പ് ലക്ഷ്യമിടുന്നതായി ഇക്കണോമിക് ടൈംസ് റിപ്പോർട്ട് ചെയ്യുന്നു.
മുംബൈ, അഹമ്മദാബാദ് വിമാനത്താവളങ്ങൾക്കു പുറമേ തിരുവനന്തപുരം, നവി മുംബൈ നിർദിഷ്ട വിമാനത്താവളം ഉൾപ്പെടെ രാജ്യത്തെ 8 വിമാനത്താവളങ്ങളുടെ നിയന്ത്രണച്ചുമതലയുള്ള കമ്പനിയാണ് അദാനി എയർപോർട് ഹോൾഡിങ്സ്. ഗ്രൂപ്പ് പ്രവർത്തിപ്പിക്കുന്ന മറ്റ് എയർപോർട്ടുകളിലേക്കും ഉടനടി ഗ്രൗണ്ട് ഹാൻഡ്ലിങ് ശ്രമം നടത്തും. ഭാവിയിൽ ഡൽഹി, ബെംഗളൂരു പോലുള്ള എയർപോർട്ടുകളിലേക്കും പ്രവർത്തനം വ്യാപിപ്പിക്കാനാണ് പദ്ധതി.
ആദ്യ ഘട്ടമായി മുംബൈ വിമാനത്താവളത്തിന്റെ ഗ്രൗണ്ട് ഹാൻഡ്ലിങ് ടെൻഡറിൽ അദാനി ഗ്രൂപ്പ് പങ്കെടുക്കുമെന്ന് അദാനി എയർപോർട്ട് ഹോൾഡിങ്സ് ലിമിറ്റഡ് സിഇഒ അരുൺ ബൻസാൽ വ്യക്തമാക്കി. നിലവിൽ അദാനി ഉടമസ്ഥതയിലുള്ള എട്ട് വിമാനത്താവളങ്ങളിൽ അവസരമുണ്ട്. എന്നാൽ മറ്റ് വിമാനത്താവളങ്ങളിലേക്കും സേവനങ്ങൾ നൽകാൻ ശ്രമം നടത്തും-അദ്ദേഹം പറഞ്ഞു. അനുരാഗ് ശ്രീവാസ്തവയെ എഎഎച്ച്എൽ ഗ്രൗണ്ട് ഹാൻഡ്ലിങ് വിഭാഗം സിഇഒ ആയി നിയമിച്ചതായും റിപ്പോർട്ടിൽ പറയുന്നു.
മെയ് 15നാണ് ബ്യൂറോ ഓഫ് സിവിൽ ഏവിയേഷൻ സെക്യൂരിറ്റി (BCAS) സെലിബിയുടെ ഇന്ത്യൻ പ്രവർത്തനത്തിനുള്ള സുരക്ഷാ അനുമതി റദ്ദാക്കിയത്. ഇതിനെ തുടർന്നാണ് അദാനി ഗ്രൂപ്പിന്റെ നീക്കം.
Adani Group is set to enter airport ground handling, bidding for contracts at major Indian airports after Çelebi’s exit. Learn about their expansion plans and new CEO.
