ഒറ്റത്തവണ പണമടച്ചാൽ ദേശീയപാതകളിലൂടെ പരിധിയില്ലാതെ സഞ്ചരിക്കാൻ സാധിക്കുന്ന പുതിയ ടോൾ നയം അവതരിപ്പിക്കാൻ കേന്ദ്ര സർക്കാർ. ഒറ്റത്തവണ 3000 രൂപ വാർഷിക ഫീസ് നൽകി ഒരു വർഷത്തേക്ക് പരിധിയില്ലാതെ സഞ്ചരിക്കാൻ സാധിക്കുന്ന സംവിധാനമാണിത്. ഡിജിറ്റൽ സാങ്കേതികവിദ്യ ഉപയോഗിച്ച് ഹൈവേ യാത്ര മെച്ചപ്പെടുത്തുന്നതിനും ചിലവ് കുറയ്ക്കുന്നതിനും ടോൾ പേയ്മെന്റുകൾ ലളിതമാക്കുന്നതിനുമുള്ള സർക്കാർ പദ്ധതിയുടെ ഭാഗമാണിത്.
നിലവിലുള്ള ടോൾ പേയ്മെന്റ് രീതിക്ക് പകരമായി നിർദ്ദിഷ്ട ഫാസ്ടാഗ് വാർഷിക ടോൾ പാസ് നടപ്പിലാക്കാനാണ് ശ്രമം. ഈ പദ്ധതി തിരഞ്ഞെടുക്കുന്ന സ്വകാര്യ വാഹന ഉടമകൾക്ക് ടോൾ ബൂത്ത് കടക്കുമ്പോഴെല്ലാം ആവർത്തിച്ചുള്ള കിഴിവുകൾ നേരിടാതെ ദേശീയ പാതകളിലൂടെയും എക്സ്പ്രസ് വേകളിലൂടെയും സഞ്ചരിക്കാനാകും. തിരക്ക് കുറയ്ക്കുക, ഡിജിറ്റൽ പേയ്മെന്റുകൾ പ്രോത്സാഹിപ്പിക്കുക, ഒറ്റത്തവണ പേയ്മെന്റ് സംവിധാനത്തിലൂടെ യാത്രാനുഭവം ലഘൂകരിക്കുക എന്നിവയാണ് ലക്ഷ്യം.
ഫാസ്റ്റ് ടാഗ് അക്കൗണ്ടുകൾ ഇടയ്ക്കിടെ റീചാർജ് ചെയ്യേണ്ടതിന്റെയോ വ്യക്തിഗത ടോൾ കിഴിവുകൾ ട്രാക്ക് ചെയ്യേണ്ടതിന്റെയോ ആവശ്യകത ഇല്ലാതാക്കുന്നതാകും പുതിയ മാറ്റം. ദിവസേനയുള്ള യാത്രക്കാർ, വാണിജ്യ വാഹന ഓപ്പറേറ്റർമാർ എന്നിങ്ങനെ റോഡ് മാർഗം പതിവായി യാത്ര ചെയ്യുന്ന ആളുകൾക്ക് ഇത് ഏറെ ഗുണം ചെയ്യും.
The Indian government plans to introduce an annual toll pass for national highways, allowing unlimited travel for ₹3000. This new FASTag-based system aims to simplify journeys and reduce costs.
