ബെംഗളൂരുവിന്റെ ഐപിഎൽ വിജയാഘോഷത്തിനിടെ ഉണ്ടായ അപകടത്തിൽ മൗനം വെടിഞ്ഞ് വിരാട് കോഹ്ലി. 11 പേർ മരിച്ച അതിദാരുണമായ അപകടത്തെപ്പറ്റി റോയൽ ചലഞ്ചേഴ്സ് ബെംഗളൂരു പ്രതികരണം അറിയിച്ചതിന് പിന്നാലെയാണ് കോഹ്ലിയും പ്രതികരണവുമായി രംഗത്തെത്തിയിരിക്കുന്നത്.
ബുധനാഴ്ച വൈകിട്ടാണ് രാജ്യത്തെ നടുക്കിയ ദുരന്തം സംഭവിച്ചത്. ആർസിബിയുടെ വിക്ടറി പരേഡിൽ പങ്കെടുക്കാനായി ചിന്നസ്വാമി സ്റ്റേഡിയത്തിന് പുറത്തെത്തിയ നിരവധി പേർ തിക്കിലും തിരക്കിലും പെടുകയായിരുന്നു. 11 പേർ മരണപ്പെട്ടു. നിരവധി പേർക്ക് പരിക്കുമുണ്ട്. ആർസിബിയുടെ ഔദ്യോഗിക പ്രസ്താവന സമൂഹമാധ്യമത്തിൽ വിരാട് കോഹ്ലി റീപോസ്റ്റ് ചെയ്തു. പറയാൻ വാക്കുകൾ കിട്ടുന്നില്ലെന്നും ഹൃദയം ശരിക്കും തകർന്നുപോയതായും കോഹ്ലി ഇൻസ്റ്റഗ്രാമിൽ കുറിച്ചു. നേരത്തെ സമൂഹമാധ്യമത്തിൽ പങ്കുവെച്ച പ്രസ്താവനയിലൂടെയാണ് ടീം ദുഃഖം രേഖപ്പെടുത്തിയത്. തിക്കിലും തിരക്കിലും പെട്ട 11 പേരുടെ വിയോഗം അത്യന്തം ദുഃഖകരമാണെന്നും ദുരന്തത്തിൽ ജീവൻ നഷ്ടപ്പെട്ടവരുടെ കുടുംബാംഗങ്ങൾക്ക് അനുശോചനം അറിയിക്കുന്നതായും ടീം സമൂഹമാധ്യമത്തിൽ കുറിച്ചു.
സ്റ്റേഡിയത്തിനു പുറത്ത് ആരാധകർ മരിച്ചുവീഴുന്നതിനിടെയും ആഘോഷങ്ങൾ തുടർന്ന ആർസിബി മാനേജ്മെന്റിനെതിരെ രൂക്ഷ വിമർശനങ്ങളും ഉയർന്നിരുന്നു. ഈ സാഹചര്യത്തിലാണ് ആർസിബിയും തുടർന്ന് കോഹ്ലിയും മൗനം വെടിഞ്ഞ് രംഗത്തെത്തിയത്.
Virat Kohli has responded to the tragic incident during Royal Challengers Bangalore’s IPL victory celebrations in Bengaluru, which resulted in 11 deaths. Kohli expressed his heartbreak on Instagram.
