കഴിഞ്ഞ ദിവസം പുതിയ ഡിസൈനോടെയുള്ള കെഎസ്ആർടിസി ബസ്സുകൾ സമൂഹമാധ്യമങ്ങളിൽ ശ്രദ്ധിക്കപ്പെട്ടിരുന്നു. കെഎസ്ആർടിസി നവീകരണത്തിന്റെ ഭാഗമായി എത്തുമെന്ന് മന്ത്രി ഗണേഷ് കുമാർ ഉറപ്പുനൽകിയ പുതിയ ബസുകളാണ് ഇപ്പോൾ എത്തി തുടങ്ങിയിരിക്കുന്നത്. ഇതുവരെയുള്ള കെഎസ്ആർടിസി ഡിസൈനിൽ നിന്ന് വേറിട്ട ലുക്കാണ് ഇപ്പോൾ എത്തിയിരിക്കുന്ന ബസുകൾക്കുള്ളത്. സൂപ്പർഫാസ്റ്റ്, ഫാസ്റ്റ് പാസഞ്ചറുകളാണ് ലുക്കിൽ വൻ മാറ്റത്തോടെ എത്തിയിരിക്കുന്നത്. ഇതോടെ ഇവ സമൂഹമാധ്യമങ്ങളിലും ശ്രദ്ധിക്കപ്പെടുകയായിരുന്നു.
ഓട്ടമൊബൈൽ കോർപ്പറേഷൻ ഓഫ് ഗോവ ലിമിറ്റഡാണ് (ACGL) കെഎസ്ആർടിയുടെ ഏറ്റവും പുതിയ ബോഡി ഡിസൈനിനു പിന്നിൽ. ടാറ്റ ഷാസിയിലാണ് നിർമാണം. എസിജിഎൽ നിർമിക്കുന്ന ബസുകളിലെ ആദ്യ ബസുകൾ സംസ്ഥാനത്തേക്ക് എത്തിക്കുന്നതിന്റെ ചിത്രമാണ് സമൂഹമാധ്യമങ്ങളിൽ പ്രചരിക്കുന്നത്. സംഭവം ക്ലാസ്സിക്ക് ലുക്കാണെന്ന് നെറ്റിസൺസ് പ്രതികരിക്കുന്നു. എന്നാൽ പുതിയ ഡിസൈനിനെതിരെ വിമർശനവും ഉയരുന്നുണ്ട്. ഡിസൈൻ വെറും തട്ടിക്കൂട്ടാണെന്നും എഴുപതുകളിലെ വണ്ടി പോലെയുണ്ട് എന്നുമെല്ലാം പോകുന്നു കമന്റുകൾ.
പുതിയ 140ഓളം ബസുകൾ വാങ്ങുന്നതിനായാണ് കെഎസ്ആർടിസി അഡ്വാൻസ് നൽകിയിരിക്കുന്നത്. ടാറ്റയ്ക്കു പുറമേ അശോക് ലെയ്‌ലാൻഡ്, ഐഷർ എന്നിവയുടേയും ബസുകൾ വാങ്ങുന്നുണ്ട്. 60 സൂപ്പർ ഫാസ്റ്റ്, 20 ഫാസ്റ്റ് പാസഞ്ചർ, എട്ട് എസി സ്ലീപ്പറുകൾ, 10 എസി സ്ലീപ്പർ കം സീറ്ററുകൾ, എട്ട് എസി സെമി സ്ലീപ്പറുകൾ എന്നിവയാണ് പുതുതായി എത്തുക.
Kerala’s KSRTC introduces new bus designs by ACGL on Tata chassis as part of its modernization, sparking mixed reactions on social media.
