2025 സാമ്പത്തിക വർഷത്തിലെ വാർഷിക പൊതുയോഗ റിപ്പോർട്ട് പുറത്തിറക്കി മുകേഷ് അംബാനിയുടെ (Mukesh Ambani) ഉടമസ്ഥതയിലുള്ള റിലയൻസ് ഇൻഡസ്ട്രീസ് ലിമിറ്റഡ് (RIL). മുകേഷ് അംബാനിയുടെ മക്കളായ ഇഷ അംബാനി (Isha Ambani), ആകാശ് അംബാനി (Akash Ambani), അനന്ത് അംബാനി (Anant Ambani) എന്നിവർക്ക് കമ്പനിയിൽ നിന്നും തുല്യമായ പ്രതിഫലം ലഭിച്ചതായി വാർഷിക റിപ്പോർട്ട് വ്യക്തമാക്കുന്നു.
നോൺ-എക്സിക്യൂട്ടീവ്, മുഴുവൻ സമയ ഡയറക്ടർമാർ തുടങ്ങിയവരുടെ സാമ്പത്തിക വർഷത്തിലെ വരുമാനം അടക്കമാണ് റിലയൻസ് വെളിപ്പെടുത്തിയിരിക്കുന്നത്. ഇഷ, ആകാശ്, അനന്ത് അംബാനി എന്നിവർക്ക് 2025 സാമ്പത്തിക വർഷത്തിൽ കമ്മീഷനായി 2.25 കോടി രൂപയും സിറ്റിംഗ് ഫീസായി 0.06 കോടി രൂപയും ലഭിച്ചു. ഇവരുടെ ശമ്പളം ഓരോരുത്തർക്കും 2.31 കോടി രൂപ വീതമാണ്. അതേസമയം 2025 സാമ്പത്തിക വർഷത്തിൽ തുടർച്ചയായ അഞ്ചാം വർഷവും ശമ്പളം സ്വീകരിക്കാതെ ജോലി ചെയ്ത് ശ്രദ്ധേയനാകുകയാണ് മുകേഷ് അംബാനി.
2023 ഒക്ടോബറിലാണ് മുകേഷ് അംബാനിയുടെ മൂന്ന് മക്കളും ആർഐഎൽ ബോർഡിൽ നോൺ എക്സിക്യൂട്ടീവ് ഡയറക്ടർമാരായി നിയമിതരായത്. എന്നാൽ ആ സമയത്ത് ഇവർക്ക് ശമ്പളത്തിന് അർഹതയുണ്ടായിരുന്നില്ല. പകരം 2023–24 സാമ്പത്തിക വർഷത്തേക്ക് ₹4 ലക്ഷം സിറ്റിംഗ് ഫീസും ₹97 ലക്ഷം കമ്മീഷനുമായിരുന്നു ലഭിച്ചിരുന്നത്. ആകാശ് അംബാനി നിലവിൽ ജിയോ ഇൻഫോകോമിന്റെ ചെയർമാനായും ഇഷ അംബാനി റിലയൻസ് റീടെയിലിന്റെ എക്സിക്യൂട്ടീവ് ഡയറക്ടരായും പ്രവർത്തിക്കുന്നു. 2020 മുതൽ ജിയോ പ്ലാറ്റ്ഫോംസിന്റേയും 2022 മുതൽ റിലയൻസ് വെഞ്ച്വർ, റിലയൻസ് ന്യൂ എനർജി എന്നീ കമ്പനികളുടെ ചുമതല വഹിക്കുന്ന അനന്ത് റിലയൻസ് എക്സിക്യൂട്ടീവ് ഡയറക്ടർ കൂടിയാണ്.
Isha, Akash, and Anant Ambani each earned ₹2.31 crore from Reliance in FY25, while their father, Mukesh Ambani, took no salary.
