വിദേശത്തുള്ള ഇന്ത്യയുടെ ആദ്യ പ്രതിരോധ നിർമാണ കേന്ദ്രം മൊറോക്കോയിൽ (Morocco) ആരംഭിച്ചു. മൊറോക്കോയിലെ ബെറെച്ചിഡിലുള്ള (Berrechid) ടാറ്റ അഡ്വാൻസ്ഡ് സിസ്റ്റംസ് ലിമിറ്റഡിന്റെ (TASL) പ്രതിരോധ നിർമാണ കേന്ദ്രം പ്രതിരോധ മന്ത്രി രാജ്നാഥ് സിങ്ങും മൊറോക്കൻ പ്രതിരോധ മന്ത്രി അബ്ദുലത്തീഫ് ലൗദിയും ചേർന്നാണ് ഉദ്ഘാടനം നിർവഹിച്ചത്.
ഇന്ത്യയും മൊറോക്കോയും തമ്മിലുള്ള തന്ത്രപരമായ പങ്കാളിത്തത്തിലെ ചരിത്ര നിമിഷമാണ് നിർമാണകേന്ദ്രമെന്ന് രാജ്നാഥ് സിംഗ് പറഞ്ഞു. ടിഎഎസ്എല്ലും ഡിഫൻസ് റിസേർച്ച് ആൻഡ് ഡെവലപ്‌മെന്റ് ഓർഗനൈസേഷനും (DRDO) സംയുക്തമായി രൂപകൽപന ചെയ്ത് തദ്ദേശീയമായി വികസിപ്പിച്ച വീൽഡ് ആർമ്ഡ് പ്ലാറ്റ്‌ഫോമിന്റെ (WhAP) ഉത്പാദനം ഈ സൗകര്യം ഏറ്റെടുക്കുമെന്നും അദ്ദേഹം കൂട്ടിച്ചേർത്തു.
കരാർ പ്രകാരം, ടിഎഎസ്എൽ ഈ വാഹനങ്ങൾ റോയൽ മൊറോക്കൻ (Royal Moroccan Army) ആർമിക്ക് കൈമാറുമെന്നും പ്രാരംഭ ഡെലിവെറികൾ അടുത്ത മാസം ആരംഭിക്കുമെന്നും പ്രതിരോധ മന്ത്രാലയം അറിയിച്ചു. മൊറോക്കോയിലെ ഏറ്റവും വലിയ പ്രതിരോധ നിർമാണ കേന്ദ്രവും ആഫ്രിക്കയിൽ ഒരു ഇന്ത്യൻ സ്വകാര്യ കമ്പനി നിർമിക്കുന്ന ആദ്യത്തെ പ്ലാന്റും കൂടിയാണിത്.
India’s first overseas defense manufacturing facility by TASL has been inaugurated in Morocco. It will produce the indigenously developed WhAP for the Royal Moroccan Army.
