രാജ്യത്തെ ആദ്യ വനിതാ ലോക്കോ പൈലറ്റായ സുരേഖ യാദവ് അടുത്തിടെ ജോലിയിൽ വിരമിച്ചിരുന്നു. 36 വർഷത്തിലധികം നീണ്ട ഔദ്യോഗിക സേവനത്തിനു ശേഷമായിരുന്നു സുരേഖയുടെ വിരമിക്കൽ.
ധൈര്യത്തിൻറെയും പ്രചോദനത്തിൻറെയും പ്രതീകമായ സുരേഖയുടെ ട്രെയിൻ നിയന്ത്രണ യാത്ര 1988ലാണ് ആരംഭിച്ചത്. ഏഷ്യയിലെതന്നെ ആദ്യ വനിതാ ലോക്കോപൈലറ്റ് എന്ന ഖ്യാതിയോടെയായിരുന്നു സുരേഖയുടെ യാത്രയുടെ തുടക്കം. പുരുഷാധിപത്യം അരങ്ങുവാണിരുന്ന ഈ രംഗത്ത് എല്ലാ വെല്ലുവിളികളേയും തകർത്തായിരുന്നു അവരുടെ മുന്നേറ്റം. തുടർന്ന് 1990ൽ സുരേഖ അസിസ്റ്റന്റ് ഡ്രൈവറായി.
മഹാരാഷ്ട്രയിലെ സത്താര ജില്ലയിലെ സാധാരണ കർഷക കുടുംബത്തിൽ ജനിച്ച സുരേഖ യാദവ് റെയിൽവേയിൽ ചേരുന്നതിന് മുമ്പ് ഇലക്ട്രിക്കൽ എഞ്ചിനീയറിംഗിൽ ഡിപ്ലോമ പൂർത്തിയാക്കി. മുംബൈയിലെ പ്രാദേശിക ട്രെയിനുകൾക്ക് പുറമേ, ഗുഡ്‌സ് ട്രെയിനുളും സുരേഖ ഓടിച്ചു. കൂടാതെ, രാജ്യത്തെ ഏറ്റവും അഭിമാനകരമായ ട്രെയിനുകളായ വന്ദേ ഭാരത്, രാജധാനി എക്‌സ്പ്രസ് ഉൾപ്പെടെയുള്ളവയുടെ നിയന്ത്രണവും സുരേഖ ഏറ്റെടുത്തു.
ഇന്ത്യൻ റെയിൽവേയുടെ ചരിത്രത്തിലെതന്നെ ഏറ്റവും ശ്രദ്ധേയമായ അധ്യായങ്ങളിൽ ഒന്നാണ് സുരേഖ യാദവിന്റേത്. അവരുടെ ധൈര്യവും അർപ്പണബോധവും രാജ്യത്തെ നിരവധി സ്ത്രീകൾക്ക് സ്വപ്നങ്ങൾ പിന്തുടരാൻ പ്രചോദനമാകും.
Learn about the inspiring journey of Surekha Yadav, India’s (and Asia’s) first woman loco pilot, who recently retired after 36 years, having driven Vande Bharat and Rajdhani Express trains.
