തിരുവനന്തപുരം നഗരത്തിലെ ഗതാഗതക്കുരുക്ക് കുറയ്ക്കുന്നതിനായുള്ള പേരൂർക്കട ഫ്ലൈഓവർ നിർമാണത്തിന് ടെൻഡർ ക്ഷണിച്ചു. 67.02 കോടി രൂപ ചിലവിലാണ് പദ്ധതി നടപ്പാക്കുന്നത്. സംസ്ഥാന സർക്കാർ ചുമതലപ്പെടുത്തിയ റോഡ്സ് ആൻഡ് ബ്രിഡ്ജസ് ഡെവലപ്മെന്റ് കോർപറേഷൻ ഓഫ് കേരള ലിമിറ്റഡ് (RBDCK) ഫ്ലൈഓവറിന്റെ ഡിസൈൻ തയ്യാറാക്കുകയും നിർമാണ പ്രവർത്തനങ്ങൾ ഏകോപിപ്പിക്കുകയും ചെയ്യും. അംഗീകൃത ഡ്രോയിംഗുകളും സാങ്കേതിക മാനദണ്ഡങ്ങളും അനുസരിച്ച് ജംഗ്ഷൻ വികസനം, റോഡ് മാർക്കിംഗ്, സോളാർ തെരുവുവിളക്കുകളുടെ സ്ഥാപനം എന്നിവ ഉൾപ്പെടെയുള്ള അനുബന്ധ പ്രവർത്തനങ്ങളും പദ്ധതിയിൽ ഉൾപ്പെടുത്തിയിട്ടുണ്ട്.
910 മീറ്റർ ആകെ നീളമുള്ള ഫ്ലൈഓവറിന്റെ ഇരുവശങ്ങളിലും 98.70 മീറ്ററർ, 60.79 മീറ്റർ അപ്രോച്ച് റോഡുകളുണ്ടാകും. നിലവിലുള്ള റോഡിന്റെ 148 മീറ്റർ ഭാഗത്ത് ഓവർലേ പ്രവർത്തനങ്ങളും, 550 മീറ്റർ നീളമുള്ള ജംഗ്ഷൻ ഓവർലേയും പദ്ധതിയിൽ ഉൾപ്പെടുന്നു. 8.90 മീറ്റർ വീതിയുള്ള കാരേജ്വേയോടൊപ്പം ഇരുവശങ്ങളിലും 0.50 മീറ്റർ വീതിയുള്ള ക്രാഷ് ബാരിയറുകൾ സ്ഥാപിക്കുന്നതോടെ ഡെക്കിന്റെ ആകെ വീതി 9.90 മീറ്ററാകും. പൈൽ ഫൗണ്ടേഷൻ സംവിധാനവും നിർദേശിച്ചിട്ടുണ്ട്. കൂടാതെ 7.5 മീറ്റർ വീതിയുള്ള സർവീസ് റോഡും 1.5 മീറ്റർ വീതിയുള്ള ഫുട്പാത്ത്-കം-ഡ്രെയിനും നിർമിക്കും. ഡ്രെയിനേജ് സംവിധാനം നിലവിലുള്ള നെറ്റ്വർക്കുമായി ബന്ധിപ്പിക്കും. പദ്ധതി പൂർത്തിയാക്കുന്നതിനായി മൂന്ന് മാസത്തെ ഡിസൈൻ അംഗീകാര കാലാവധിയും, തുടർന്ന് 21 മാസത്തെ നിർമാണ കാലാവധിയും നിശ്ചയിച്ചിട്ടുണ്ട്.
Tenders invited for the ₹67.02 crore Peroorkada Flyover project in Thiruvananthapuram. Managed by RBDCK, the 910m flyover aims to resolve long-standing traffic issues.
