ഇന്ത്യൻ റെയിൽവേ അടിയന്തര യാത്രാ ആവശ്യങ്ങൾ നിറവേറ്റുന്നതിനായി വിവിധ ബുക്കിംഗ് ക്വോട്ടകൾ ഏർപ്പെടുത്തിയിട്ടുണ്ട്. ഇതിൽ പ്രധാനപ്പെട്ട ഒന്നാണ് എമർജൻസി ക്വോട്ട (Emergency Quota – EQ). എന്നാൽ ഈ ക്വോട്ട എല്ലാവർക്കും ലഭ്യമല്ല; നിശ്ചിത വിഭാഗം യാത്രക്കാർക്കായി മാത്രമാണ് ഇത് അനുവദിച്ചിട്ടുള്ളത്. അടിയന്തര സാഹചര്യങ്ങളിൽ യാത്ര അനിവാര്യമായവർക്ക് പരിമിതമായ സീറ്റുകൾ സംവരണം ചെയ്യുക എന്നതാണ് എമർജൻസി ക്വോട്ടയുടെ ഉദ്ദേശ്യം.
റെയിൽവേ മന്ത്രാലയത്തിന്റെ വിശദീകരണമനുസരിച്ച്, ഹൈ ഓഫിഷ്യൽ റെക്വിസിഷൻ (HOR) വിഭാഗത്തിൽപ്പെടുന്നവർ—കേന്ദ്ര മന്ത്രിമാർ, സുപ്രീംകോടതി/ഹൈക്കോടതി ജഡ്ജിമാർ, പാർലമെന്റ് അംഗങ്ങൾ എന്നിവർക്കാണ് പ്രധാനമായും എമർജൻസി ക്വോട്ടിലൂടെ യാത്രാസൗകര്യം അനുവദിക്കുന്നത്. കൂടാതെ സർക്കാർ ചുമതല, കുടുംബത്തിലെ മരണവാർത്ത, ഗുരുതര രോഗം, ജോലി അഭിമുഖം തുടങ്ങിയ അടിയന്തര ആവശ്യങ്ങൾ ഉള്ള മറ്റ് യാത്രക്കാരുടെ അപേക്ഷകളും റെയിൽവേ പരിഗണിക്കും. വിവിധ ട്രെയിനുകളിലും ക്ലാസുകളിലും പരിമിതമായ സീറ്റുകളാണ് ഈ ക്വോട്ടയ്ക്ക് കീഴിൽ മാറ്റിവെച്ചിരിക്കുന്നത്.
എമർജൻസി ക്വോട്ട അനുവദിക്കുന്നതിനുള്ള തീരുമാനം വാറന്റ് ഓഫ് പ്രിസീഡൻസ് അനുസരിച്ചുള്ള മുൻഗണനാക്രമം പാലിച്ചാണ് എടുക്കുന്നതെന്ന് റെയിൽവേ വ്യക്തമാക്കി. ആദ്യം HOR വിഭാഗക്കാരുടെയും പാർലമെന്റ് അംഗങ്ങളുടെയും സ്വയം യാത്രയ്ക്കാണ് ക്വോട്ട അനുവദിക്കുക. തുടർന്ന് ലഭിക്കുന്ന മറ്റ് അപേക്ഷകൾ യാത്രക്കാരന്റെ ഔദ്യോഗിക പദവി, യാത്രയുടെ അടിയന്തര ആവശ്യം തുടങ്ങിയ ഘടകങ്ങൾ കണക്കിലെടുത്ത് പരിഗണിക്കും. ദുരുപയോഗം തടയുന്നതിനായി, എമർജൻസി ക്വോട്ട സീറ്റുകൾ റിട്ടൺ അപേക്ഷകളുടെ അടിസ്ഥാനത്തിൽ മാത്രമേ അനുവദിക്കാവൂ എന്ന നിർദേശം റെയിൽവേ ബോർഡ് എല്ലാ സോണുകൾക്കും നൽകിയിട്ടുണ്ട്. Zonal, Divisional ഹെഡ്ക്വാർട്ടേഴ്സുകളിലും ചില പ്രധാന സ്റ്റേഷനുകളിലുമാണ് എമർജൻസി ക്വോട്ട സെല്ലുകൾ പ്രവർത്തിക്കുന്നത്.
What is the Emergency Quota (EQ) in Indian Railways? Learn about eligibility for HOR officials, MPs, and common passengers facing medical or family emergencies, and how the Zonal EQ cells process these requests.
