ഹിന്ദുസ്ഥാൻ എയറോനോട്ടിക്സ് ലിമിറ്റഡുമായി (HAL) വമ്പൻ കരാറിൽ ഒപ്പിട്ട് പ്രതിരോധ മന്ത്രാലയം. ഇന്ത്യൻ കോസ്റ്റ് ഗാർഡിന് (ICG) എട്ട് ഡോർണിയർ 228 വിമാനങ്ങളും (Dornier 228 aircraft) ഓപ്പറേഷണൽ ഉപകരണങ്ങളും വാങ്ങുന്നതിനായാണ് പ്രതിരോധ മന്ത്രാലയവും എച്ച്എഎല്ലുമായുള്ള കരാർ. പ്രതിരോധ സെക്രട്ടറി രാജേഷ് കുമാർ സിങ്ങിന്റെ സാന്നിധ്യത്തിലാണ് കരാർ ഒപ്പിട്ടത്.
എച്ച്എഎല്ലിന്റെ ഉൽപ്പാദന ആവാസവ്യവസ്ഥയെ ശക്തിപ്പെടുത്തുന്നതിലൂടെയും എംഎസ്എംഇകളുടെയും അനുബന്ധ വ്യവസായങ്ങളുടെയും വിശാലമായ ശൃംഖലയെ പിന്തുണയ്ക്കുന്നതിലൂടെയും കരാർ പ്രത്യക്ഷമായും പരോക്ഷമായും വൻ തൊഴിലവസരങ്ങൾ സൃഷ്ടിക്കുമെന്ന് പ്രതീക്ഷിക്കുന്നു. അറ്റകുറ്റപ്പണി, ഓവർഹോൾ, ലൈഫ് സൈക്കിൾ സാങ്കേതിക പിന്തുണ എന്നിവയിൽ സുസ്ഥിര അവസരങ്ങളും ഇതിലൂടെ സൃഷ്ടിക്കപ്പെടും. ഇന്ത്യയുടെ സമുദ്ര സുരക്ഷാ ഘടന ശക്തിപ്പെടുത്തുന്നതിനൊപ്പം ആത്മനിർഭർ ഭാരത്, മെയ്ക്ക്-ഇൻ-ഇന്ത്യ എന്നിവയോടുള്ള സർക്കാരിന്റെ പ്രതിബദ്ധതയെ ഈ കരാർ ശക്തിപ്പെടുത്തുന്നുവെന്ന് പ്രതിരോധ മന്ത്രാലയം പ്രസ്താവനയിൽ പറഞ്ഞു.
ചെറുതും മധ്യദൂരത്തിനുള്ളതുമായ ഇരട്ട എൻജിൻ ടർബോപ്രോപ്പ് വിമാനമാണ് ഡോർണിയർ-228. മുൻപ് ജർമ്മനിയിലെ ഡോർണിയർ കമ്പനി രൂപകൽപ്പന ചെയ്ത ഈ വിമാനം 1983 മുതൽ എച്ച്എഎൽ ഇന്ത്യയിൽ നിർമ്മിക്കുന്നു. ചെറു റൺവേകളിൽ പോലും പറക്കാനും ഇറങ്ങാനും കഴിയുന്ന ശേഷിയാണ് വിമാനത്തിന്റെ പ്രത്യേകത. ഇതിനുപുറമേ, കുറഞ്ഞ ചിലവിൽ പ്രവർത്തനം, വിശ്വാസ്യത എന്നിവ കാരണം ഇത് നിരീക്ഷണം, കടൽ പട്രോൾ, ഗതാഗതം, പരിശീലനം തുടങ്ങിയ നിരവധി ആവശ്യങ്ങൾക്ക് ഉപയോഗിക്കുന്നു. ഇന്ത്യൻ പ്രതിരോധസേനയും കോസ്റ്റ് ഗാർഡും നിരീക്ഷണവും ലോജിസ്റ്റിക് പിന്തുണയും നൽകാൻ വ്യാപകമായി ഉപയോഗിക്കുന്ന ബഹുമുഖ ശേഷിയുള്ള വിമാനമാണ് ഡോർണിയർ-228.
India strengthens maritime security as the Ministry of Defence signs a major contract with HAL for eight Dornier-228 aircraft. Discover how this ‘Make in India’ initiative will boost the Coast Guard’s surveillance capabilities and support MSMEs.
