കേന്ദ്ര ധനമന്ത്രി നിർമല സീതാരാമൻ ബജറ്റിൽ പ്രഖ്യാപിച്ച വിപ്ലവകരമായ കാർഷിക പദ്ധതിയായ ഭാരത് വിസ്താർ ലോഞ്ച് ചെയ്തു. ജയ്പൂരിൽ വെച്ച് നടന്ന ചടങ്ങിൽ കേന്ദ്ര കൃഷി മന്ത്രി ശിവരാജ് സിങ്ങ് ചൗഹാൻ ആണ് പദ്ധതി ഉദ്ഘാടനം ചെയ്തത്. കർഷകർക്ക് കൃഷി സംബന്ധമായ ആവശ്യങ്ങൾ ആർട്ടിഫിഷ്യൽ ഇന്റലിജൻസിന്റെ സഹായത്തോടെ ലഭ്യമാക്കുന്നതാണ് ഭാരത് വിസ്താർ പദ്ധതി. മാത്യഭാഷയിൽ വിവരങ്ങൾ നൽകുന്ന മൾട്ടിലിംഗ്വൽ പ്ലാറ്റ്ഫോം എന്നതാണ് ഇതിന്റെ സവിശേഷത. കാർഷിക മേഖലയിലെ ഡിജിറ്റൽ വിപ്ലവത്തിലേക്കുള്ള ചരിത്രപരമായ ചുവടുവെയ്പ്പാണ് പദ്ധതിയെന്ന് മന്ത്രി പറഞ്ഞു.
പദ്ധതി നിലവിൽ വന്നതോടെ ഇനി മുതൽ കർഷകർക്ക് മൊബൈൽ ഫോൺ വഴിയോ, അല്ലെങ്കിൽ ഫോൺ കോളിലൂടെയോ വിവരങ്ങൾ അറിയാൻ കഴിയും. എഐ അസിസ്റ്റന്റിന് ഭാരതി എന്നാണ് പേര് നൽകിയിരിക്കുന്നത്. കർഷകർക്ക് 24 മണിക്കൂറും 155261 എന്ന് നമ്പറിൽ വിളിച്ച് സേവനം ആവശ്യപ്പെടാം. വിളകളുടെ ആരോഗ്യം, പ്രധാന കൃഷിരീതികൾ, കീടനാശിനികളുടെ ഉപയോഗം തുടങ്ങിയ നിർദേശങ്ങൾ വികാസ് ഭാരത് ആപ്പിലൂടെ ലഭിക്കും. കൂടാതെ ഓരോ പ്രദേശങ്ങളിലെയും കാലാവസ്ഥാ വ്യതിയാനങ്ങളെക്കുറിച്ചുള്ള വിവരങ്ങളും വിപണിയിലെ വിലവിവരങ്ങളും കർഷകർക്ക് ലഭ്യമാകുന്നു. പിഎം കിസാൻ, പിഎം ഫസൽ ബീമാ യോജന, സോയിൽ ഹെൽത്ത് കാർഡ്, കിസാൻ ക്രെഡിറ്റ് കാർഡ് തുടങ്ങി പത്തോളം പദ്ധതികളെക്കുറിച്ചുള്ള വിവരങ്ങളും അവയിൽ അപേക്ഷിക്കേണ്ട രീതിയുമടക്കം ഇതിൽ ലഭ്യമാകും.
22ലധികം പ്രാദേശിക ഭാഷകളിലാണ് പ്ലാറ്റ്ഫോമിന്റെ ഇന്റർഫേസും ഉള്ളടക്കവും ലഭിക്കുക. പദ്ധതിയിലൂടെ കർഷകർക്ക് കേന്ദ്ര, സംസ്ഥാന സർക്കാർ ആനൂകൂല്യങ്ങൾ ഡിജിറ്റൽ വിൻഡോയിലൂടെ നേരിട്ട് ലഭ്യമാകുന്നു. കാർഷിക ഉൽപ്പാദനക്ഷമത വർദ്ധിപ്പിക്കുകയും കൃഷിയിലെ നഷ്ടസാധ്യതകൾ കുറയ്ക്കുകയും ചെയ്യുക എന്ന ലക്ഷ്യത്തോടെയാണ് ഈ പദ്ധതി വിഭാവനം ചെയ്തിരിക്കുന്നത്. ഐസിഎആർ നൽകുന്ന ശാസ്ത്രീയ നിർദ്ദേശങ്ങളും അഗ്രിസ്റ്റാക്ക് പോർട്ടലിലെ വിവരങ്ങളും സംയോജിപ്പിച്ചാണ് ഈ എഐ ടൂൾ പ്രവർത്തിക്കുന്നത്. 2026 -27 ലെ കേന്ദ്ര ബജറ്റിൽ നിർമല സീതാരാമൻ പദ്ധതി പ്രഖ്യാപിച്ചിരുന്നു. ഭാരത് വിസ്താറിനായി 150 കോടി രൂപയാണ് സർക്കാൻ അനുവദിച്ചത്.
Discover Bharat Vistar, India’s revolutionary AI platform for farmers. With the ‘Bharati’ assistant available in 22 languages via call (155261) or app, farmers can now access 24/7 crop advice, weather alerts, and market prices.
