500 മില്യൺ ഡോളർ മൂല്യമുള്ള കപ്പൽനിർമാണ സംയുക്ത സംരംഭം സ്ഥാപിക്കാനുള്ള ചർച്ചകൾ സജീവമാക്കി കൊച്ചിൻ ഷിപ്യാർഡ് ലിമിറ്റഡും (CSL) ദക്ഷിണ കൊറിയൻ കമ്പനി എച്ച്ഡി ഹ്യുണ്ടായ് ഗ്രൂപ്പും (HD Hyundai). ഇന്ത്യയിലെ പ്രധാന കപ്പൽനിർമാണ അടിസ്ഥാന സൗകര്യങ്ങളിൽ ഏതെങ്കിലുമൊരു ആഗോള കപ്പൽനിർമാണ ഭീമൻ നേരിട്ട് നിക്ഷേപിക്കുന്ന ആദ്യ പദ്ധതിയാകും ഇതെന്ന് ദേശീയമാധ്യമങ്ങൾ റിപ്പോർട്ട് ചെയ്യുന്നു.
രണ്ടു കമ്പനികളും തുല്യ പങ്കാളിത്തത്തോടെ രൂപീകരിക്കാൻ ഉദ്ദേശിക്കുന്ന സംരംഭം, ചൈന, ദക്ഷിണ കൊറിയ, ജപ്പാൻ പോലുള്ള പ്രമുഖ രാജ്യങ്ങളോടൊപ്പം ഇന്ത്യയും ശക്തമായ കപ്പൽനിർമാണ രാഷ്ട്രമായി ഉയരാനുള്ള ദീർഘകാല ലക്ഷ്യത്തിലേക്ക് നിർണായക മുന്നേറ്റമാകും. നിലവിൽ ഏഷ്യൻ കപ്പൽശാലകൾ മുഴുവൻ ശേഷിയിലും പ്രവർത്തിക്കുകയും ഓർഡർ ബുക്കുകൾ വർഷങ്ങളോളം നിറഞ്ഞുനിൽക്കുകയും ചെയ്യുന്ന സാഹചര്യത്തിൽ ഈ സംരംഭത്തിന്റെ സമയം ഏറെ നിർണായകമാണ്.
എച്ച്ഡി ഹ്യുണ്ടായ് ഗ്രൂപ്പിന്റെ കപ്പൽനിർമാണ വിഭാഗമായ എച്ച്ഡി കൊറിയ ഷിപ് ബിൽഡിംഗ് ആൻഡ് ഓഫ്ഷോർ എൻജിനീയറിംഗ് (HD KSOE) പങ്കാളിത്തത്തിലുണ്ടാകും. ചർച്ചകൾ അന്തിമമാക്കാൻ ഈ മാസം സിഎസ്എൽ പ്രതിനിധി സംഘം ദക്ഷിണ കൊറിയ സന്ദർശിക്കും. ഇതിനകം തന്നെ എച്ച്ഡി ഹ്യുണ്ടായ് പ്രതിനിധികൾ കൊച്ചി സന്ദർശിക്കുകയും പ്രാഥമിക വിലയിരുത്തലുകൾ നടത്തുകയും ചെയ്തിട്ടുണ്ട്. കരാർ 2026 രണ്ടാം പാദത്തിൽ പ്രതീക്ഷിക്കുന്നതായി സിഎസ്എൽ വ്യക്തമാക്കി.
Cochin Shipyard and global giant HD Hyundai are in talks for a $500 million shipbuilding joint venture. Discover how this historic partnership aims to position India alongside global leaders like China and Japan.
