ഐക്യരാഷ്ട്രസഭയുടെ (UN) ആഗോള ‘സീറോ വേസ്റ്റ് സിറ്റി’ പട്ടികയിൽ ഇടംനേടി വർക്കല മുനിസിപ്പാലിറ്റി. കേരളത്തിന്റെ മാലിന്യ സംസ്കരണ മാതൃകയ്ക്കുള്ള ശ്രദ്ധേയ അംഗീകാരമായാണ് നേട്ടം വിലയിരുത്തപ്പെടുന്നത്. അന്താരാഷ്ട്ര സീറോ വേസ്റ്റ് ദിനാചരണത്തോട് അനുബന്ധിച്ച് യുഎൻ ഹാബിറ്റേറ്റും യുഎഎൻഇപിയും ‘സീറോ വേസ്റ്റ് സിറ്റി’ ആയി അംഗീകരിച്ച ലോകമെമ്പാടുമുള്ള 20 നഗരങ്ങളുടെ പട്ടികയിലാണ് വർക്കല മുനിസിപ്പാലിറ്റി ഇടം നേടിയിരിക്കുന്നത്.
ഏഷ്യയിൽ നിന്ന് ആഗോള പട്ടികയിൽ ഇടം നേടിയ രണ്ട് നഗരങ്ങളിൽ ഒന്നാണ് വർക്കല. വർക്കലയുടെ ടൂറിസം സാധ്യതകൾക്ക് കൂടുതൽ പ്രോത്സാഹനം നൽകുന്ന അംഗീകാരം ഉടൻ ഔദ്യോഗികമായി പ്രഖ്യാപിക്കുമെന്ന് തദ്ദേശ സ്വയംഭരണ മന്ത്രി എം.ബി. രാജേഷ് പറഞ്ഞു. കേരളത്തിന്റെ വികേന്ദ്രീകൃത മാലിന്യ സംസ്കരണ മാതൃകയിലേക്കുള്ള ആഗോള ശ്രദ്ധ വർദ്ധിച്ചുവരുന്നതിലേക്കാണ് ഈ അംഗീകാരം വിരൽ ചൂണ്ടുന്നതെന്ന് അദ്ദേഹം വ്യക്തമാക്കി. സമഗ്ര മാലിന്യ സംസ്കരണ സംവിധാനത്തിലൂടെ മികച്ച പ്രകടനം കാഴ്ചവെയ്ക്കുന്ന മുനിസിപ്പാലിറ്റികളിൽ വർക്കല സ്ഥിരമായി സ്ഥാനം പിടിച്ചിട്ടുണ്ടെന്ന് തദ്ദേശ സ്വയംഭരണ വകുപ്പ് സ്പെഷ്യൽ സെക്രട്ടറി ടി.വി. അനുപമ പറഞ്ഞു.
Varkala Municipality makes history by joining the UN’s global list of 20 ‘Zero Waste Cities.’ Recognized by UN-Habitat and UNEP, Varkala is one of only two Asian cities honored for excellence in decentralized waste management
