കേരളത്തിലെ ആദ്യ ബാറ്ററി എനെർജി സ്റ്റോറേജ് പദ്ധതിക്കായുള്ള (BESS) നിർമാണ പ്രവർത്തനങ്ങൾക്ക് തുടക്കമിട്ടിരിക്കുകയാണ്. കാസർകോട് മൈലാട്ടിയിൽ 220 കെവി സബ്സ്റ്റേഷൻ പരിസരത്താണ് 125 MW / 500 MWh ശേഷിയുള്ള ബിഇഎസ്എസ് പദ്ധതി യാഥാർത്ഥ്യമാകുന്നത്. 135 കോടി രൂപയുടെ കേന്ദ്ര സർക്കാർ വയബിലിറ്റി ഗ്യാപ് ഫണ്ട് സഹായത്തോടെയുള്ള പദ്ധതി, സോളാർ എനർജി കോർപറേഷൻ ഓഫ് ഇന്ത്യയുമായി സഹകരിച്ചാണ് കെഎസ്ഇബി നടപ്പാക്കുന്നത്. 4 മണിക്കൂർ തുടർച്ചയായോ അല്ലാതെയോ വൈദ്യുതി ലഭ്യമാക്കാനാകുന്ന രാജ്യത്തെ ആദ്യ ബാറ്ററി എനെർജി സ്റ്റോറേജ് പദ്ധതി കൂടിയാണിത്. സംസ്ഥാനത്തിനോ കെഎസ്ഇബിക്കോ പ്രാരംഭ മുതൽമുടക്കില്ല എന്ന സവിശേഷതയുമുണ്ട്.
സംസ്ഥാനത്ത്, പുരപ്പുറ സൗരോർജ്ജ നിലയങ്ങളിൽ നിന്നുൾപ്പെടെ പകൽ സമയത്ത് കുറഞ്ഞ വിലയ്ക്ക് സുലഭമായ വൈദ്യുതി ഉന്നതശേഷിയുള്ള ബാറ്ററികളിൽ ശേഖരിച്ച്, വൈദ്യുതി ഉപയോഗം കൂടിയ പീക്ക് അവേർസിൽ ലഭ്യമാക്കുന്നതിനുള്ള സംവിധാനമാണ് ബിഇഎസ്എസ് എന്ന ചുരുക്കപ്പേരിൽ അറിയപ്പെടുന്ന ബാറ്ററി എനെർജി സ്റ്റോറേജ് സിസ്റ്റം. 550 കോടി രൂപ മുതൽ മുടക്ക് വരുന്ന പദ്ധതി മുൻകൂർ പേയ്മെന്റ് നൽകാതെ താരിഫ് അടിസ്ഥാനമാക്കി ബിൽഡ് ഓൺ ഓപ്പറേറ്റ് മാതൃകയിലാണ് നടപ്പാക്കുന്നത്. പദ്ധതിയുടെ നിർമ്മാണച്ചെലവ് അധിക ബാധ്യത വരാതെ പീക്ക് സമയത്തെ വൈദ്യുതി വാങ്ങൽച്ചെലവിൽ കുറവ് വരുന്ന തുകയിൽ നിന്നും നൽകാൻ കഴിയും.
ബാറ്ററി ഊർജ സംഭരണ പദ്ധതിയുടെ നിർമാണ പ്രവർത്തനങ്ങൾ വൈദ്യുതി മന്ത്രി കെ. കൃഷ്ണൻകുട്ടി ഉദ്ഘാടനം ചെയ്തു. താരതമ്യേന കുറഞ്ഞ നിർമ്മാണ കാലയളവ് മാത്രം വേണ്ടി വരുന്ന പദ്ധതി 2026 ഒക്ടോബറിൽ പൂർത്തീകരിക്കാനാണ് ലക്ഷ്യമിടുന്നത്.
Work begins on Kerala’s first Battery Energy Storage System (BESS) in Kasaragod. Supported by ₹135 Cr central funding, this 125 MW project by KSEB & SECI aims to stabilize peak-hour power supply by Oct 2026.
