കേന്ദ്ര സഹകരണ മന്ത്രാലയത്തിന് കീഴിലുള്ള ഇന്ത്യയിലെ ആദ്യത്തെ സഹകരണ റൈഡ്-ഹെയ്ലിംഗ് പ്ലാറ്റ്ഫോമായ ‘ഭാരത് ടാക്സി’ക്ക് (Bharat Taxi) വൻ സ്വീകാര്യത. ഫെബ്രുവരി 5ന് കേന്ദ്രമന്ത്രി അമിത് ഷാ ഉദ്ഘാടനം ചെയ്ത ആപ്പ് ഇതുവരെ 27.3 ലക്ഷത്തിലധികം പേരാണ് ഡൗൺലോഡ് ചെയ്തത്. സെൻസർ ടവർ ഡാറ്റ പ്രകാരം ഇതിൽ 84.2% (23 ലക്ഷം) ആൻഡ്രോയിഡ് ഉപയോക്താക്കളും 15.8% ഐഫോൺ (iOS) ഉപയോക്താക്കളുമാണുള്ളത്.
ഓല, ഊബർ, റാപ്പിഡോ തുടങ്ങിയ സ്വകാര്യ കമ്പനികൾക്ക് പകരമായി ഡ്രൈവർമാരുടെ ഉടമസ്ഥതയിലുള്ള മാതൃകയാണ് ഭാരത് ടാക്സി മുന്നോട്ട് വെയ്ക്കുന്നത്. ഓരോ ഡ്രൈവർക്കും പ്ലാറ്റ്ഫോമിൽ അഞ്ച് ഷെയറുകൾ വീതം ഉണ്ടായിരിക്കും. കൂടാതെ, മറ്റ് പ്ലാറ്റ്ഫോമുകളിൽ നിന്ന് വ്യത്യസ്തമായി ഓരോ റൈഡിലും ഡ്രൈവർമാരിൽ നിന്ന് കമ്മീഷൻ ഈടാക്കില്ല എന്നതും ഇതിന്റെ പ്രത്യേകതയാണ്. തിരക്കുള്ള സമയങ്ങളിൽ നിരക്ക് വർദ്ധിപ്പിക്കുന്ന (Surge Pricing) രീതി ഭാരത് ടാക്സിയിൽ ഇല്ല എന്നതും ശ്രദ്ധേയമാണ്.
ലാഭത്തിന്റെ 80 ശതമാനവും ഡ്രൈവർമാർക്ക് തന്നെ നൽകുമെന്ന് അധികൃതർ ഉറപ്പുനൽകുന്നു. മാർച്ച് 1 വരെയുള്ള കണക്കനുസരിച്ച് 2.31 ലക്ഷം ഡ്രൈവർമാർ ആപ്പിലുണ്ട്. നിലവിൽ ഡൽഹി-എൻസിആർ മേഖലയിലും ഗുജറാത്തിലെ തിരഞ്ഞെടുത്ത നഗരങ്ങളിലുമാണ് (അഹമ്മദാബാദ്, രാജ്കോട്ട്, സോമനാഥ്, ദ്വാരക) സേവനം ലഭ്യമാകുന്നത്. അടുത്ത രണ്ട് മൂന്ന് വർഷത്തിനുള്ളിൽ രാജ്യത്തെ എല്ലാ പ്രധാന നഗരങ്ങളിലേക്കും താലൂക്കുകളിലേക്കും സേവനം വ്യാപിപ്പിക്കാനാണ് ലക്ഷ്യം. ഇത്തരം സവിശേഷതകൾക്കൊപ്പവും സ്വകാര്യ കമ്പനികളുടെ കുത്തക അവസാനിപ്പിക്കാൻ ഈ സർക്കാർ സംരംഭത്തിന് കഴിയുമോ എന്നത് വരും ദിവസങ്ങളിലെ വിപുലീകരണത്തെയും ഡ്രൈവർമാരുടെ സഹകരണത്തെയും ആശ്രയിച്ചിരിക്കും.
Bharat Taxi has surpassed 27 lakh downloads, reflecting rapid growth and strong user adoption across India’s mobility sector.
