ഇന്ത്യയുടെ അടുത്ത തലമുറ വിമാനവാഹിനിക്കപ്പലായ ഐഎൻഎസ് വിശാലിന്റെ (IAC-III) രൂപരേഖ തയ്യാറാക്കുന്നതിൽ നാവികസേനയും ഡിആർഡിഒയും നിർണ്ണായക പുരോഗതി കൈവരിച്ചു. നിലവിലുള്ള ഐഎൻഎസ് വിക്രാന്തിനേക്കാൾ വലുപ്പമുള്ള ഈ കപ്പൽ 65,000 മുതൽ 70,000 ടൺ വരെ ഭാരമുള്ള വമ്പൻ പ്ലാറ്റ്ഫോമായിരിക്കും രൂപകൽപ്പന ചെയ്യുന്നത്.
ഡ്രോണുകളെയും യുദ്ധവിമാനങ്ങളെയും ഒരേസമയം ഏകോപിപ്പിച്ചു പ്രവർത്തിപ്പിക്കാൻ കഴിയുന്ന ‘മാൻഡ്-അൺമാൻഡ് ടീമിംഗ്’ (MUM-T) സംവിധാനമാണ് ഇതിന്റെ പ്രധാന സവിശേഷത. സ്റ്റെൽത്ത് ഡ്രോണുകൾക്കും റാഫേൽ എം യുദ്ധവിമാനങ്ങൾക്കും പുറമെ അത്യാധുനിക ഇലക്ട്രോമാഗ്നറ്റിക് വിക്ഷേപണ സംവിധാനവും കപ്പലിൽ ഒരുക്കും. സമുദ്ര സുരക്ഷയ്ക്കായി മൂന്ന് വിമാനവാഹിനിക്കപ്പലുകൾ എന്ന ലക്ഷ്യം കൈവരിക്കുന്നതിന്റെ ഭാഗമായാണ് ഇന്ത്യ ഈ ബൃഹത്തായ പദ്ധതിയുമായി മുന്നോട്ട് പോകുന്നത്. 2030ഓടെ കമ്മീഷൻ ചെയ്യാൻ ലക്ഷ്യമിടുന്ന ഐഎൻഎസ് വിശാൽ, ഇന്ത്യൻ സമുദ്രമേഖലയിൽ രാജ്യത്തിന്റെ പ്രതിരോധ കരുത്ത് ഇരട്ടിയാക്കും
