ഇന്ത്യൻ ഫാർമസ്യൂട്ടിക്കൽ മേഖലയിലെ ഏറ്റവും വലിയ വിദേശ ഏറ്റെടുക്കലുകളിലൊന്നായി സൺ ഫാർമസ്യൂട്ടിക്കൽസ് യുഎസ് കമ്പനിയായ ഓർഗാനോൺ ആൻഡ് കമ്പനിയെ (Organon & Co.) സ്വന്തമാക്കി. 11.75 ബില്യൺ ഡോളറിന്റേതാണ് ഈ വമ്പൻ കരാർ. 2007ൽ ടാറ്റാ സ്റ്റീൽ കോറസിനെ ഏറ്റെടുത്തതിന് ശേഷം ഒരു ഇന്ത്യൻ കമ്പനി നടത്തുന്ന ഏറ്റവും വലിയ വിദേശ ഇടപാടാണിത്. ഇതോടെ ആഗോള ഫാർമ രംഗത്തെ ആദ്യ 25 കമ്പനികളുടെ പട്ടികയിൽ സൺ ഫാർമ ഇടംപിടിക്കും.
മരുന്നുകളിലെ നവീകരണവും ബയോസിമിലറുകളിലെ വിപണി വിഹിതവും വർദ്ധിപ്പിക്കാനാണ് സൺ ഫാർമ ഈ നീക്കത്തിലൂടെ ലക്ഷ്യമിടുന്നത്. നിലവിൽ ആഗോളതലത്തിൽ 12.4 ബില്യൺ ഡോളർ വാർഷിക വരുമാനമുള്ള കമ്പനിയായി ഇതോടെ സൺ ഫാർമ മാറും. കൂടാതെ, കമ്പനിയുടെ മൊത്തം വരുമാനത്തിൽ ഇന്നൊവേറ്റീവ് മരുന്നുകളുടെ വിഹിതം 27 ശതമാനമായി ഉയരുകയും ചെയ്യും. ലഭ്യമായ പണശേഖരവും ബാങ്ക് വായ്പകളും ഉപയോഗിച്ചാണ് കരാർ പൂർത്തിയാക്കുന്നത്. ഒപ്പം ഓർഗാനോണിന്റെ 8.6 ബില്യൺ ഡോളർ വരുന്ന കടബാധ്യതയും സൺ ഫാർമ ഏറ്റെടുക്കും.
സ്ത്രീകളുടെ ആരോഗ്യം, ബയോസിമിലറുകൾ തുടങ്ങിയ മേഖലകളിൽ മുൻപന്തിയിലുള്ള ഓർഗാനോണിനെ സ്വന്തമാക്കുന്നത് സൺ ഫാർമയുടെ അമേരിക്കൻ വിപണിയിലെ സ്വാധീനം ശക്തമാക്കും. സൺ ഫാർമ സ്ഥാപകൻ ദിലീപ് സാങ്വിയുടെ നേതൃത്വത്തിലുള്ള ഏറ്റെടുക്കൽ തന്ത്രങ്ങളിൽ വലിയ ആത്മവിശ്വാസമാണ് നിക്ഷേപകർ പ്രകടിപ്പിക്കുന്നത്. ഇടപാട് വാർത്ത പുറത്തുവന്നതോടെ സൺ ഫാർമയുടെ ഓഹരി വിലയിൽ 5 ശതമാനത്തിലധികം വർദ്ധനവുണ്ടായി. ജെനറിക് മരുന്നുകളിൽ നിന്ന് മാറി സ്പെഷ്യാലിറ്റി മരുന്നുകളിലേക്ക് ശ്രദ്ധ കേന്ദ്രീകരിക്കാനുള്ള കമ്പനിയുടെ ദീർഘകാല ലക്ഷ്യത്തിന്റെ ഭാഗമായാണ് ഈ നടപടി.
Sun Pharma marks India’s largest overseas acquisition since 2007 by acquiring US-based Organon & Co. for $11.75 billion. This deal propels Sun Pharma into the global top 25 pharma companies
