വിദേശ നിക്ഷേപം വർദ്ധിപ്പിക്കുന്നതിനും സാമ്പത്തിക വളർച്ച ഉറപ്പാക്കുന്നതിനുമായി പുതിയ ‘ഗോൾഡൻ വിസ’ പദ്ധതിയുമായി ദ്വീപ് രാഷ്ട്രമായ മൗറീഷ്യസ്. പ്രതിവർഷം 100 അതിസമ്പന്നരായ വ്യക്തികളെ (High-Net-Worth-Individuals) രാജ്യത്തേക്ക് ആകർഷിക്കാനാണ് സർക്കാർ ലക്ഷ്യമിടുന്നത്. ഈ വിസ ലഭിക്കുന്നതിനായി വിദേശ നിക്ഷേപകർ മൗറീഷ്യസിലെത്തി 12 മാസത്തിനുള്ളിൽ കുറഞ്ഞത് 10 ലക്ഷം ഡോളർ രാജ്യത്ത് നിക്ഷേപിക്കണം. കുടുംബത്തോടൊപ്പം മൗറീഷ്യസിലേക്ക് താമസം മാറാൻ താല്പര്യപ്പെടുന്ന വിദേശികളിൽ നിന്ന് നിരവധി അന്വേഷണങ്ങൾ ലഭിച്ചതിനെത്തുടർന്നാണ് ഈ തീരുമാനമെന്ന് പ്രധാനമന്ത്രി നവിൻചന്ദ്ര രാംഗൂലം പാർലമെന്റിൽ വ്യക്തമാക്കി.
ഫിൻടെക്, ആർട്ടിഫിഷ്യൽ ഇന്റലിജൻസ്, ബയോടെക്നോളജി, പുനരുപയോഗ ഊർജ്ജം എന്നീ മേഖലകളിലെ നിക്ഷേപങ്ങളാണ് പ്രധാനമായും ലക്ഷ്യമിടുന്നത്. ഗോൾഡൻ വിസ പദ്ധതികൾ വഴി കള്ളപ്പണം വെളുപ്പിക്കൽ പോലുള്ള നിയമവിരുദ്ധ പ്രവർത്തനങ്ങൾ നടക്കാതിരിക്കാൻ കർശനമായ പരിശോധനകൾ ഉറപ്പാക്കുമെന്നും പ്രധാനമന്ത്രി അറിയിച്ചു. ഇത്തരം വിസകൾ സാധാരണക്കാരുടെ പാർപ്പിട സൗകര്യങ്ങളെ ബാധിക്കില്ലെന്നും നിക്ഷേപകർ വിദേശികൾക്കായി നിശ്ചയിച്ചിട്ടുള്ള പ്രോപ്പർട്ടികളിലോ ഹോട്ടലുകളിലോ മാത്രമേ താമസിക്കൂ എന്നും അദ്ദേഹം കൂട്ടിിച്ചേർത്തു. അമേരിക്ക ഉൾപ്പെടെയുള്ള രാജ്യങ്ങൾ സമാനമായ പദ്ധതികൾ നടപ്പിലാക്കുന്നുണ്ടെങ്കിലും, യൂറോപ്പിലെ ചില രാജ്യങ്ങൾ സുരക്ഷാ കാരണങ്ങളാൽ ഇത്തരം വിസകൾ നിർത്തലാക്കുന്നതിനിടയിലാണ് മൗറീഷ്യസിന്റെ ഈ നീക്കം.
Mauritius introduces a new Golden Visa program requiring a $1 million investment within 12 months. Targeting 100 high-net-worth individuals annually, the plan focuses on sectors like AI and Fintech to drive sustainable growth.
