നരേന്ദ്ര മോദിയുടെ യൂറോപ്യൻ പര്യടനത്തിന്റെ അവസാന ഘട്ടമായുള്ള ഇറ്റലി സന്ദർശനത്തിൽ ഇരുരാജ്യങ്ങളും തമ്മിലുള്ള ബന്ധം തന്ത്രപ്രധാന തലത്തിലേക്ക് ഉയരുന്നു. പ്രധാനമന്ത്രി നരേന്ദ്ര മോദിയും ഇറ്റാലിയൻ പ്രധാനമന്ത്രി ജോർജിയ മെലോനിയും ചേർന്നുള്ള സംയുക്ത പ്രസ്താവനയിലാണ് ഇന്ത്യ-ഇറ്റലി സഹകരണത്തിനായുള്ള സമഗ്ര ഭാവി റോഡ്മാപ്പ് വ്യക്തമാക്കിയത്. വ്യാപാരം, സാങ്കേതികവിദ്യ, ഊർജം, പ്രതിരോധം, ബഹിരാകാശം, സുരക്ഷ എന്നീ മേഖലകളിൽ ഇരുരാജ്യങ്ങളും തമ്മിലുള്ള ബന്ധം ശക്തമാക്കുമെന്ന് നേതാക്കൾ പ്രഖ്യാപിച്ചു. സ്വാതന്ത്ര്യം, ജനാധിപത്യം എന്നീ പൊതുമൂല്യങ്ങളിൽ അധിഷ്ഠിതമായ ഈ ബന്ധം വെറുമൊരു സൗഹൃദത്തിനപ്പുറം ആഗോളതലത്തിൽ പുതിയ ചലനങ്ങൾ സൃഷ്ടിക്കാൻ പോന്ന സവിശേഷ പങ്കാളിത്തമായി മാറിയെന്ന് ഇരുവരും ചൂണ്ടിക്കാട്ടി.
ഇന്ത്യൻ മഹാസമുദ്രത്തെയും യൂറോപ്പിനെയും പരസ്പരം ബന്ധിപ്പിക്കുന്ന ‘ഇന്തോ-മെഡിറ്ററേനിയൻ’ ഇടനാഴിയുടെ പ്രാധാന്യത്തെക്കുറിച്ചും ഇരുനേതാക്കളും പ്രതിപാദിച്ചു. സാമ്പത്തിക മേഖലയിലെ നിർണായക കേന്ദ്രങ്ങളായ ഇന്തോ-പസഫിക്കും മെഡിറ്ററേനിയനും ഇനി വേറിട്ടുനിൽക്കുന്നവയല്ല, മറിച്ച് പരസ്പരം കൈകോർക്കുന്ന ഇടങ്ങളാണെന്ന് ഇരുവരും ഓർമ്മിപ്പിച്ചു. ഈ പശ്ചാത്തലത്തിൽ, ഇന്ത്യ-മിഡിൽ ഈസ്റ്റ്-യൂറോപ്പ് ഇക്കണോമിക് കോറിഡോർ (IMEC) യാഥാർത്ഥ്യമാക്കാൻ ഇരുരാജ്യങ്ങളും പ്രതിജ്ഞാബദ്ധമാണ്. 2029-ഓടെ ഉഭയകക്ഷി വ്യാപാരം 20 ബില്യൺ യൂറോ എന്ന ലക്ഷ്യത്തിലേക്ക് എത്തിക്കുകയോ അതിനേക്കാൾ ഉയർത്തുകയോ ചെയ്യുകയാണ് പ്രധാന ലക്ഷ്യം. ഇതിനായി പ്രതിരോധം, എയ്റോസ്പേസ്, ഹരിത സാങ്കേതികവിദ്യ, ഫാർമസ്യൂട്ടിക്കൽസ് തുടങ്ങിയ മേഖലകളിൽ കൂടുതൽ ഊന്നൽ നൽകും. ‘മെയ്ഡ് ഇൻ ഇറ്റലി’ എന്ന മികവും ഇന്ത്യയുടെ ‘മേക്ക് ഇൻ ഇന്ത്യ’ പദ്ധതിയും ഒത്തുചേരുന്നതിലൂടെ വലിയ സാമ്പത്തിക മുന്നേറ്റമാണ് പ്രതീക്ഷിക്കുന്നത്.
ഡിജിറ്റൽ ഇൻഫ്രാസ്ട്രക്ചർ, ആർട്ടിഫിഷ്യൽ ഇന്റലിജൻസ് (AI) എന്നീ മേഖലകളിലെ സഹകരണത്തിനും പുതിയ റോഡ്മാപ്പിൽ വലിയ പ്രാധാന്യമുണ്ട്. മനുഷ്യന്റെ അന്തസ്സിനും ജനാധിപത്യ പ്രക്രിയകൾക്കും കോട്ടം തട്ടാത്ത രീതിയിലുള്ള ഉത്തരവാദിത്തമുള്ള AI വികസനമാണ് ഇരുരാജ്യങ്ങളും ലക്ഷ്യമിടുന്നത്. ഇന്ത്യയുടെ ഡിജിറ്റൽ സ്കെയിലും ഇറ്റലിയുടെ സാങ്കേതിക വൈദഗ്ധ്യവും ഒത്തുചേരുമ്പോൾ ആഗോളതലത്തിൽ തന്നെ ഇതൊരു മാതൃകയാകും. റോമിൽ എത്തിയ പ്രധാനമന്ത്രി നരേന്ദ്ര മോദിക്ക് ഇന്ത്യൻ സമൂഹത്തിൽ നിന്നും ഇറ്റാലിയൻ ഭരണകൂടത്തിൽ നിന്നും ഊഷ്മളമായ സ്വീകരണമാണ് ലഭിച്ചത്. ഔദ്യോഗിക ചർച്ചകൾക്ക് മുന്നോടിയായി ഇരുനേതാക്കളും റോമിലെ ചരിത്രപ്രസിദ്ധമായ കൊളോസിയം സന്ദർശിക്കുകയും ചെയ്തു. ഗ്ലോബൽ ബയോഫ്യുവൽസ് അലയൻസ് അടക്കമുള്ള സുപ്രധാന പദ്ധതികളിലും ഇരുരാജ്യങ്ങളും ഒരുമിച്ച് മുന്നോട്ട് പോകുമെന്ന് നേതാക്കൾ വ്യക്തമാക്കി.
PM Narendra Modi and Italian PM Giorgia Meloni have outlined a strategic roadmap to elevate India-Italy relations, targeting a €20 billion trade goal by 2029
