2047-ഓടെ രാജ്യത്തെ ആണവോർജ്ജ ഉൽപ്പാദന ശേഷി 100 ഗിഗാവാട്ടായി (GW) ഉയർത്താൻ ലക്ഷ്യമിട്ട് ഇന്ത്യ. ആണവോർജ്ജ മേഖല സ്വകാര്യ പങ്കാളിത്തത്തിനായി തുറന്നുനൽകുന്നതിലൂടെ ഏകദേശം 7.5 ലക്ഷം കോടി രൂപയുടെ സ്വകാര്യ നിക്ഷേപവും 30 ഗിഗാവാട്ട് വൈദ്യുതി ഉൽപ്പാദന സംഭാവനയും പ്രതീക്ഷിക്കുന്നതായി ആറ്റോമിക് എനർജി കമ്മീഷൻ ചെയർമാൻ എ.കെ. മൊഹന്തി വ്യക്തമാക്കി.
വർദ്ധിച്ചുവരുന്ന വൈദ്യുതി ആവശ്യകത പരിഹരിക്കാനും കുറഞ്ഞ കാർബൺ ഉദ്‌വമനത്തിലൂടെ ഊർജ്ജ സുരക്ഷ ശക്തമാക്കാനുമാണ് ഈ നീക്കം. ലോകത്തിലെ തോറിയം നിക്ഷേപത്തിന്റെ 25 ശതമാനവും ഇന്ത്യയിലാണെന്നും, ഇത് രാജ്യത്തിന്റെ രണ്ടാം, മൂന്നാം ഘട്ട ആണവ പദ്ധതികൾക്ക് വലിയ കരുത്താകുമെന്നും അദ്ദേഹം കൂട്ടിച്ചേർത്തു.
നിലവിൽ 24 റിയാക്ടറുകളിൽ നിന്നായി 8.78 ഗിഗാവാട്ട് ആണവോർജ്ജ ശേഷിയാണ് ഇന്ത്യക്കുള്ളത്. ഇത് 2031-32 ഓടെ 22 ഗിഗാവാട്ടായും തുടർന്ന് 2047-ൽ 100 ഗിഗാവാട്ടായും വർദ്ധിപ്പിക്കാനാണ് സർക്കാർ പദ്ധതി. പൊതുമേഖലാ സ്ഥാപനമായ ന്യൂക്ലിയർ പവർ കോർപ്പറേഷൻ ഓഫ് ഇന്ത്യ ലിമിറ്റഡിന്റെ (NPCIL) ശേഷി 54 ഗിഗാവാട്ടായും, മറ്റ് പൊതുമേഖലാ-സ്വകാര്യ സ്ഥാപനങ്ങൾ വഴിയുള്ള ഉൽപ്പാദനം 46 ഗിഗാവാട്ടായും വിഭജിക്കും.
ഈ ലക്ഷ്യങ്ങൾ കൈവരിക്കുന്നതിനായി ആണവ മേഖലയിൽ സ്വകാര്യ പങ്കാളിത്തം ഉറപ്പാക്കുന്ന ‘ശാന്തി’ (SHANTI) നിയമം സർക്കാർ പ്രാബല്യത്തിൽ വരുത്തിയിട്ടുണ്ട്. കൂടാതെ, തമിഴ്‌നാട്ടിലെ കൽപ്പാക്കത്തുള്ള പ്രോട്ടോടൈപ്പ് ഫാസ്റ്റ് ബ്രീഡർ റിയാക്ടർ (PFBR) ക്രിട്ടിക്കാലിറ്റി കൈവരിച്ചതോടെ ഇന്ത്യ തങ്ങളുടെ മൂന്ന് ഘട്ട ആണവ പദ്ധതിയുടെ രണ്ടാം ഘട്ടത്തിലേക്ക് ഔദ്യോഗികമായി കടന്നു. വ്യവസായ ആവശ്യങ്ങൾക്കായി ചെറു റിയാക്ടറുകൾ (SMRs – Small Modular Reactors) സ്ഥാപിക്കാനും പദ്ധതിയുണ്ട്.
യുറേനിയം ലഭ്യത പരിമിതമായതിനാൽ, തീരദേശ മണലിലും മറ്റും കാണപ്പെടുന്ന മോണോസൈറ്റിൽ അടങ്ങിയിരിക്കുന്ന തോറിയം വിഭവങ്ങൾ പരമാവധി പ്രയോജനപ്പെടുത്തി ദീർഘകാല ഊർജ്ജ സുരക്ഷ ഉറപ്പാക്കുന്ന മൂന്ന് ഘട്ടങ്ങളായുള്ള ആണവോർജ്ജ പദ്ധതിയാണ് ഇന്ത്യ നടപ്പിലാക്കുന്നത്.
India aims to boost its nuclear power capacity to 100 GW by 2047, attracting ₹7.5 lakh crore in private investment and leveraging massive domestic thorium reserves.
