വരാനിരിക്കുന്ന നീറ്റ്-യുജി പുനഃപരീക്ഷയ്ക്ക് മുന്നോടിയായി വ്യാജ ചോദ്യപ്പേപ്പർ ചോർച്ചാ സന്ദേശങ്ങളും തെറ്റായ വിവരങ്ങളും പ്രചരിക്കുന്നത് തടയാൻ മെറ്റാ, ഗൂഗിൾ, ടെലിഗ്രാം എന്നീ മുൻനിര സോഷ്യൽ മീഡിയ പ്ലാറ്റ്ഫോമുകളുമായി കൈകോർത്ത് കേന്ദ്ര സർക്കാർ. പരീക്ഷാ അട്ടിമറികളും തെറ്റായ പ്രചാരണങ്ങളും തടയുന്നതിനായി കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാന്റെ അധ്യക്ഷതയിൽ ബുധനാഴ്ച ഉന്നതതല അവലോകന യോഗം ചേർന്നു. പരീക്ഷകൾക്ക് തൊട്ടുമുമ്പ് ടെലിഗ്രാം ഉൾപ്പെടെയുള്ള മാധ്യമങ്ങളിൽ വ്യാജ ചോർച്ചാ അവകാശവാദങ്ങളും ക്ലിക്ക്ബെയ്റ്റുകളും വർദ്ധിക്കുന്നത് യോഗം വിലയിരുത്തി. പരീക്ഷകളുമായി ബന്ധപ്പെട്ട് പരിഭ്രാന്തി ഉണ്ടാക്കുന്നതും തെറ്റിദ്ധരിപ്പിക്കുന്നതുമായ ഉള്ളടക്കങ്ങൾ കണ്ടെത്തി ബ്ലോക്ക് ചെയ്യാനും നീക്കം ചെയ്യാനും സോഷ്യൽ മീഡിയ കമ്പനികൾ യോഗത്തിൽ സജീവ സഹകരണം ഉറപ്പുനൽകിയിട്ടുണ്ട്.
കഴിഞ്ഞ മെയ് 3-ന് നടന്ന നീറ്റ് പരീക്ഷ ചോദ്യപ്പേപ്പർ ചോർച്ചയെ തുടർന്ന് റദ്ദാക്കിയ സാഹചര്യത്തിലാണ് ജൂൺ 21-ന് വീണ്ടും പരീക്ഷ നടത്താൻ നിശ്ചയിച്ചിരിക്കുന്നത്. 22 ലക്ഷത്തിലധികം വിദ്യാർത്ഥികളാണ് വീണ്ടും പരീക്ഷ എഴുതുന്നത്. ഓർഗനൈസ്ഡ് നെറ്റ്വർക്കുകൾ വഴി പ്രവർത്തിക്കുന്ന വ്യാജ ടെലിഗ്രാം ചാനലുകൾ വിദ്യാർത്ഥികളിൽ പരിഭ്രാന്തി സൃഷ്ടിക്കുന്നത് തടയുക എന്നതിനാണ് സർക്കാർ മുൻഗണന നൽകുന്നത്. സുരക്ഷിതവും സുതാര്യവുമായ രീതിയിൽ പരീക്ഷ നടത്താൻ സുരക്ഷാ-ഇന്റലിജൻസ് ഏജൻസികളോട് അതീവ ജാഗ്രത പാലിക്കാൻ കേന്ദ്രമന്ത്രി നിർദ്ദേശിച്ചു. കൂടാതെ, ഭാവിയിൽ ഇത്തരം സുരക്ഷാ വീഴ്ചകൾ ഒഴിവാക്കാൻ 2027 മുതൽ നീറ്റ് പരീക്ഷ കമ്പ്യൂട്ടർ അധിഷ്ഠിത പരീക്ഷയായി (CBT) മാറ്റുമെന്നും അധികൃതർ അറിയിച്ചു.
The Centre partners with Meta, Google, and Telegram to block fake question paper leak posts ahead of the upcoming NEET-UG re-examination on June 21.
