കൊച്ചി നഗരത്തെ ലോകോത്തര അടിസ്ഥാന സൗകര്യങ്ങളും മികച്ച യാത്രാസൗകര്യങ്ങളുമുള്ള മാതൃകാ നഗരമാക്കി മാറ്റുമെന്ന് മുഖ്യമന്ത്രി വി.ഡി. സതീശൻ. നിലവിലുള്ള അതിരുകൾ വ്യാപിപ്പിച്ചു കൊണ്ട് ‘ട്വിൻ സിറ്റി’ മാതൃകയിലായിരിക്കും കൊച്ചിയെ വികസിപ്പിക്കുക. യുഡിഎഫ് സർക്കാരിന്റെ മുഖ്യ മുൻഗണനകളിൽ ഒന്നാണ് നഗര ആസൂത്രണമെന്നും ഇതിന്റെ പ്രയോജനം നഗരവാസികൾക്ക് മാത്രമല്ല സമീപ ഗ്രാമങ്ങളിലുള്ളവർക്കും ലഭിക്കുമെന്നും കൊച്ചിയിൽ നൽകിയ പൗരസ്വീകരണത്തിൽ സംസാരിക്കവെ അദ്ദേഹം വ്യക്തമാക്കി.
ഇതിനായി അടുത്ത ആറുമാസത്തിനകം നഗരത്തിന്റെ വിശദമായ മാസ്റ്റർ പ്ലാൻ തയ്യാറാക്കും. സംസ്ഥാനത്തിന്റെ സാമ്പത്തിക രംഗം മെച്ചപ്പെടുത്താനും ജനങ്ങളുടെ ജീവിതനിലവാരം ഉയർത്താനുമുള്ള സ്വപ്ന പദ്ധതികൾ നടപ്പിലാക്കാൻ സർക്കാർ പ്രതിജ്ഞാബദ്ധമാണെന്നും, വലിയ കെട്ടിടങ്ങൾ നിർമ്മിക്കുന്നത് മാത്രമല്ല സാധാരണക്കാരുടെ ജീവിതത്തിൽ പുരോഗമനപരമായ മാറ്റങ്ങൾ കൊണ്ടുവരുന്നതാണ് യഥാർത്ഥ വികസനമെന്നും മുഖ്യമന്ത്രി കൂട്ടിച്ചേർത്തു.
ഉന്നതവിദ്യാഭ്യാസ അവസരങ്ങൾ വർദ്ധിപ്പിച്ചും പുതിയ സംരംഭങ്ങൾക്ക് പിന്തുണ നൽകിയും സംസ്ഥാനത്ത് നിന്നുള്ള പ്രതിഭകളുടെ ഒഴുക്ക് തടയാൻ നടപടി സ്വീകരിക്കുമെന്നും അദ്ദേഹം വ്യക്തമാക്കി. കടവന്ത്ര രാജീവ് ഗാന്ധി ഇൻഡോർ സ്റ്റേഡിയത്തിൽ നടന്ന ചടങ്ങിൽ ജില്ലാ കളക്ടർ ജി. പ്രിയങ്ക അധ്യക്ഷത വഹിച്ചു. എല്ലാ വിഭാഗം ജനങ്ങളെയും കേൾക്കാനും സംസാരിക്കാനും ആവശ്യപ്പെടുന്ന വലിയ ഉത്തരവാദിത്തമാണ് മുഖ്യമന്ത്രിയെ തേടിയെത്തിയിരിക്കുന്നതെന്ന് ചടങ്ങിൽ മുഖ്യാതിഥിയായി പങ്കെടുത്ത നടൻ മമ്മൂട്ടി പറഞ്ഞു.
തുടർന്ന് തന്റെ മണ്ഡലമായ പറവൂരിൽ നടന്ന സ്വീകരണ ചടങ്ങിൽ നടൻ മോഹൻലാലും പങ്കെടുത്തു; സതീശന്റെ സത്യസന്ധതയും സുതാര്യതയുമാണ് പറവൂരിന് മാത്രമല്ല, കേരളത്തിന് മുഴുവൻ ഈ വ്യക്തിയെ വേണമെന്ന് ജനങ്ങളെക്കൊണ്ട് ചിന്തിപ്പിച്ചതെന്ന് മോഹൻലാൽ അഭിപ്രായപ്പെട്ടു. പറവൂർ സ്വദേശിയായ നടൻ സലിം കുമാറും ചടങ്ങിൽ സംബന്ധിച്ചു.
Kerala Chief Minister V.D. Satheesan announces a comprehensive master plan to transform Kochi into a world-class ‘Twin City’ with top-tier infrastructure.
