പ്രമുഖ വാഹന നിർമ്മാതാക്കളായ ടൊയോട്ട കിർലോസ്കർ മോട്ടോർ (Toyota Kirloskar Motor) കർണാടകയിൽ വൻ നിക്ഷേപത്തിന് ഒരുങ്ങുന്നു. കർണാടക സർക്കാർ പുതുതായി വികസിപ്പിക്കുന്ന അത്യാധുനിക നഗരമായ ‘കെവിൻ സിറ്റിയിൽ’ (KWIN City – Knowledge, Well-being, and Innovation City) ആഗോള നിലവാരത്തിലുള്ള ‘ബിസ്ഇന്റൽ ഹബ്ബ്’ (BizIntel Hub) സ്ഥാപിക്കുന്നതിനായി 1200 കോടി രൂപ നിക്ഷേപിക്കാനാണ് കമ്പനി തീരുമാനിച്ചിരിക്കുന്നത്. ഇതുസംബന്ധിച്ച താല്പര്യപത്രം കർണാടക മുഖ്യമന്ത്രി സിദ്ധരാമയ്യ, വ്യവസായ മന്ത്രി എം.ബി. പാട്ടീൽ എന്നിവരുടെ സാന്നിധ്യത്തിൽ ഒപ്പുവെച്ചു.
ആഗോളതലത്തിൽ ഇത്തരത്തിലുള്ള ആദ്യ കേന്ദ്രം
ലോകത്താദ്യമായാണ് ടൊയോട്ട ഇത്തരമൊരു അത്യാധുനിക സംവിധാനം സ്ഥാപിക്കുന്നതെന്ന് മുഖ്യമന്ത്രി സിദ്ധരാമയ്യ വ്യക്തമാക്കി. പദ്ധതിക്ക് സംസ്ഥാന സർക്കാരിന്റെ പൂർണ്ണ പിന്തുണ അദ്ദേഹം ഉറപ്പുനൽകി. ഡാബസ്പേട്ടിനും ദൊഡ്ഡബല്ലാപുരയ്ക്കും ഇടയിലായി നിർമ്മിക്കുന്ന കെവിൻ സിറ്റിയിൽ വരുന്ന ആദ്യത്തെ വലിയ നിക്ഷേപമാണിത്. അടുത്ത അഞ്ച് വർഷത്തിനുള്ളിൽ പ്രാഥമിക മൂലധനമായാണ് ടൊയോട്ട ഈ 1200 കോടി രൂപ നിക്ഷേപിക്കുക.
എന്താണ് ബിസ്ഇന്റൽ ഹബ്ബ്?
ടൊയോട്ടയുടെ എഞ്ചിനീയറിംഗ് ശേഷിയും ഡിജിറ്റൽ ഇന്നൊവേഷനും വർദ്ധിപ്പിക്കുന്നതിനുള്ള പ്രധാന കേന്ദ്രമായിരിക്കും ഇത്.ഇതിനായി കെവിൻ സിറ്റിയിൽ 300 ഏക്കർ ഭൂമി ടൊയോട്ടയ്ക്ക് അനുവദിക്കും.അത്യാധുനിക വാഹന നിർമ്മാണം, വാഹനങ്ങളുടെ പരീക്ഷണങ്ങൾ (Testing and Evaluation), പുതിയ സാങ്കേതിക വിദ്യകളുടെ ഗവേഷണം എന്നിവ ഇവിടെ നടക്കും. ബിസിനസ്സ് പ്രവർത്തനങ്ങളിലെ ഡിജിറ്റൽ ഇന്നവേഷൻ, ഇന്റലിജന്റ് മാനുഫാക്ചറിങ് എന്നിവയും ഈ ഹബ്ബിന്റെ ലക്ഷ്യങ്ങളാണ്.
തൊഴിലവസരങ്ങളും കെവിൻ സിറ്റിയുടെ വികസനവും
തുടക്കത്തിൽ ഈ കേന്ദ്രം വഴി ഇരുന്നൂറോളം പേർക്ക് നേരിട്ട് തൊഴിൽ ലഭിക്കുമെന്നും സംസ്ഥാനത്തെ യുവാക്കൾക്ക് ഇതൊരു വലിയ അവസരമായിരിക്കുമെന്നും വ്യവസായ മന്ത്രി എം.ബി. പാട്ടീൽ പറഞ്ഞു. ഇന്ത്യയിലെ മികച്ച എഞ്ചിനീയറിംഗ്-ഐടി വിദഗ്ദ്ധരെ ഉപയോഗപ്പെടുത്തി ടൊയോട്ടയുടെ ആഗോള ശൃംഖലയിൽ ഇന്ത്യയ്ക്ക് വലിയ സ്ഥാനം നേടിക്കൊടുക്കാൻ ഈ ഹബ്ബിന് സാധിക്കും.
മൊത്തം 5,800 ഏക്കറിലായി ഘട്ടങ്ങളായാണ് കെവിൻ സിറ്റി വികസിപ്പിക്കുന്നത്. ഇന്നൊവേഷൻ, ആരോഗ്യം, വിവരസാങ്കേതികവിദ്യ എന്നിവയ്ക്കാണ് ഇവിടെ മുൻഗണന. ഭാവിയിൽ ഏകദേശം 48,000 കോടി രൂപയുടെ നിക്ഷേപവും ഒരു ലക്ഷത്തോളം തൊഴിലവസരങ്ങളും കെവിൻ സിറ്റിയിലൂടെ സൃഷ്ടിക്കാൻ സാധിക്കുമെന്നാണ് കർണാടക സർക്കാർ പ്രതീക്ഷിക്കുന്നത്. ലോകപ്രശസ്തമായ ഏഴോളം സർവ്വകലാശാലകളും ഗവേഷണ സ്ഥാപനങ്ങളും ഇതിനോടകം തന്നെ ഇവിടെ നിക്ഷേപം നടത്താൻ താല്പര്യം പ്രകടിപ്പിച്ചിട്ടുണ്ട്.
Toyota Kirloskar Motor signs an MoU with the Karnataka government to invest ₹1,200 crore in KWIN City to establish its first global BizIntel Hub.
