കേരളത്തിൽ പുതിയ യുഡിഎഫ് സർക്കാർ അധികാരമേറ്റ ശേഷം മുഖ്യമന്ത്രി വി.ഡി സതീശൻ ഡൽഹിയിൽ പ്രധാനമന്ത്രി നരേന്ദ്ര മോദിയുമായി തന്റെ ആദ്യ ഔദ്യോഗിക കൂടിക്കാഴ്ച നടത്തിയിരിക്കുകയാണ്. പ്രധാനമന്ത്രിയുടെ ഓഫീസായ ‘സേവാ തീർത്ഥിൽ’ വെച്ച് ചീഫ് സെക്രട്ടറി ഉൾപ്പെടുന്ന ഔദ്യോഗിക പ്രതിനിധി സംഘത്തോടൊപ്പം നടന്ന 20 മിനിറ്റ് കൂടിക്കാഴ്ച, പുതിയ സംസ്ഥാന ഭരണകൂടവും കേന്ദ്രവും തമ്മിലുള്ള സഹകരണത്തിന് തറക്കല്ലിടുന്നതായിരുന്നു.
റെയിൽവേ വികസനം, തുറമുഖ പദ്ധതികൾ, എയിംസ് (AIIMS), മെട്രോ റെയിൽ വിപുലീകരണം തുടങ്ങിയ കേരളത്തിന്റെ പ്രധാന അടിസ്ഥാന സൗകര്യ വികസനങ്ങൾക്ക് കേന്ദ്ര സർക്കാരിന്റെ പൂർണ്ണ പിന്തുണ മുഖ്യമന്ത്രി കൂടിക്കാഴ്ചയിൽ ആവശ്യപ്പെട്ടു. സംസ്ഥാനത്തിന്റെ ഭാവി വികസനത്തിനായുള്ള ആവശ്യങ്ങൾ പ്രധാനമന്ത്രിയുമായി പങ്കുവെച്ചതായും അനുകൂലമായ പ്രതികരണം പ്രതീക്ഷിക്കുന്നതായും കൂടിക്കാഴ്ചയ്ക്ക് ശേഷം വി.ഡി സതീശൻ എക്സിലൂടെ വ്യക്തമാക്കി.
കേന്ദ്ര-സംസ്ഥാന ബന്ധങ്ങളിൽ പുതിയൊരു സമവായ അന്തരീക്ഷം സൃഷ്ടിക്കാൻ ആഗ്രഹിക്കുന്ന യുഡിഎഫ് സർക്കാർ, കേരളത്തിന്റെ ദീർഘകാല ആവശ്യങ്ങൾക്ക് കേന്ദ്രത്തിൽ നിന്ന് കൃത്യമായ ഫണ്ടും അനുമതികളും ലഭിക്കുമെന്നാണ് പ്രതീക്ഷിക്കുന്നത്. നവകേരള നിർമ്മിതിക്കായുള്ള സാമ്പത്തിക സഹായങ്ങളും വികസന മുൻഗണനകളും ചർച്ച ചെയ്യുന്നതിനായി മുഖ്യമന്ത്രി കേന്ദ്ര ധനമന്ത്രി നിർമല സീതാരാമനുമായും കൂടിക്കാഴ്ച നടത്തിയിരുന്നു.
ഇതിന്റെ തുടർച്ചയായി ഇന്ന് കേന്ദ്ര ആഭ്യന്തര മന്ത്രി അമിത് ഷായുമായും വി.ഡി. സതീശൻ കൂടിക്കാഴ്ച നടത്തും. പുതിയ ഭരണകൂടത്തിന്റെ ആദ്യ ഘട്ടത്തിലുള്ള ഈ ഉന്നതതല ഇടപെടലുകൾ വഴി സംസ്ഥാനത്തിന് അർഹമായ കേന്ദ്ര സഹായങ്ങൾ വേഗത്തിലാക്കാൻ കഴിയുമെന്നാണ് യുഡിഎഫ് സർക്കാരിന്റെ വിലയിരുത്തൽ. ഈ കൂടിക്കാഴ്ചകൾക്ക് ശേഷം മുഖ്യമന്ത്രി ഇന്ന് തന്നെ കേരളത്തിലേക്ക് മടങ്ങും.
“Kerala CM V.D. Satheesan met PM Narendra Modi in Delhi to seek central support for key state projects including AIIMS, metro expansion, and railway development.”
