ഇന്ത്യക്കാരുടെ ഭക്ഷണരീതിയിൽ ഇപ്പോഴും ധാന്യങ്ങളുടെ (അരി, ഗോതമ്പ് മുതലായവ) അതിപ്രസരമാണെന്നും ശരീരത്തിന് ആവശ്യമായ പ്രോട്ടീനുകൾ, പച്ചക്കറികൾ, പഴങ്ങൾ എന്നിവയുടെ അളവ് വളരെ കുറവാണെന്നും സർക്കാർ പിന്തുണയോടെ നടത്തിയ ഏറ്റവും പുതിയ പഠന റിപ്പോർട്ട് വ്യക്തമാക്കുന്നു. ഇന്ത്യൻ കൗൺസിൽ ഓഫ് മെഡിക്കൽ റിസർച്ച് (ICMR) നിർദ്ദേശിച്ച പ്രതിമാസ ധാന്യ ഉപഭോഗ പരിധിയായ 7.5 കിലോഗ്രാമിന് താഴെ രേഖപ്പെടുത്തിയ ഏക സംസ്ഥാനം കേരളം മാത്രമാണെന്നും, അതേസമയം ഒഡീഷ, പശ്ചിമ ബംഗാൾ തുടങ്ങിയ സംസ്ഥാനങ്ങളിൽ ഇത് 11 കിലോഗ്രാമിലും മുകളിലാണെന്നും റിപ്പോർട്ടിലുണ്ട്.
ആരോഗ്യവകുപ്പ് നിർദ്ദേശിക്കുന്ന പ്രതിമാസ പച്ചക്കറി ഉപഭോഗമായ 12 കിലോഗ്രാം ഒരു സംസ്ഥാനത്ത് പോലും പൂർത്തീകരിക്കാൻ കഴിഞ്ഞിട്ടില്ലെന്ന് മാത്രമല്ല, പയറുവർഗ്ഗങ്ങളുടെ കുറഞ്ഞ ഉപഭോഗം രാജ്യത്ത് വലിയ രീതിയിലുള്ള പ്രോട്ടീൻ ദൗർലഭ്യത്തിന് കാരണമാകുന്നുമുണ്ട്. ധാന്യങ്ങൾ മാത്രം അമിതമായി കഴിക്കുന്നതും ഒപ്പം സംസ്കരിച്ച ഭക്ഷണങ്ങളുടെ വർദ്ധിച്ചുവരുന്ന ഉപയോഗവും രാജ്യത്ത് പ്രമേഹം, അമിതവണ്ണം, ഹൃദ്രോഗങ്ങൾ തുടങ്ങിയ ജീവിതശൈലി രോഗങ്ങൾ വൻതോതിൽ ഉയരാൻ കാരണമാകുമെന്ന് ആരോഗ്യവിദഗ്ദ്ധർ മുന്നറിയിപ്പ് നൽകുന്നു.
“A new government-backed report reveals Indians heavily overconsume cereals while skipping essential proteins and vegetables, raising the risk of diabetes and obesity.”
