ചൈനയെ പിന്തള്ളി ഇന്ത്യ ലോകത്തിലെ ഏറ്റവും വലിയ അരി ഉൽപ്പാദക രാജ്യമായി മാറിയെന്ന് കേന്ദ്ര കൃഷിമന്ത്രി ശിവരാജ് സിംഗ് ചൗഹാൻ അറിയിച്ചു. കാർഷിക മന്ത്രാലയം പുറത്തുവിട്ട മൂന്നാമത് മുൻകൂർ കണക്കുകൾ പ്രകാരം, 2025-26 വിളവർഷത്തിൽ രാജ്യത്തെ അരി ഉൽപ്പാദനം 154.02 മില്യൺ ടൺ എന്ന റെക്കോർഡ് നേട്ടത്തിൽ എത്തിനിൽക്കുകയാണ്. തൊട്ടുമുമ്പത്തെ വർഷം ഇത് 150.18 മില്യൺ ടൺ ആയിരുന്നു.
പ്രധാനപ്പെട്ട ഖാരിഫ് കൃഷിയിറക്കൽ സീസൺ ആരംഭിക്കാനിരിക്കെയാണ് രാജ്യം ഈ ചരിത്രനേട്ടം കൈവരിച്ചത്. അതേസമയം, ദുർബലമായ മൺസൂൺ സാധ്യതകളും വർദ്ധിച്ചുവരുന്ന കാലാവസ്ഥാ വ്യതിയാനങ്ങളും മുന്നിൽക്കണ്ട് കർഷകരെ സഹായിക്കുന്നതിനായി രാജ്യമൊട്ടാകെ നടപ്പിലാക്കാൻ പോകുന്ന അടിയന്തര പ്രതിരോധ പദ്ധതിയും സർക്കാർ ഇതോടൊപ്പം പ്രഖ്യാപിച്ചിട്ടുണ്ട്. പസഫിക് സമുദ്രത്തിലെ ‘എൽ നിനോ’ പ്രതിഭാസം മൂലമുണ്ടായേക്കാവുന്ന കാലാവസ്ഥാ വ്യതിയാനങ്ങളെയും കൃഷിനാശത്തെയും പ്രതിരോധിക്കാൻ കേന്ദ്ര സർക്കാർ മുൻകൂട്ടിയുള്ള തയ്യാറെടുപ്പുകൾ നടത്തിവരികയാണെന്നും അധികൃതർ വ്യക്തമാക്കി.
India beats China to become the world’s largest rice producer with a record 154.02 million tonnes of output in the 2025-26 crop year, despite El Nino challenges
