പ്രമുഖ ഇലക്ട്രിക് വാണിജ്യ വാഹന നിർമ്മാതാക്കളായ ഒലെക്ട്ര ഗ്രീൻടെക് (Olectra Greentech) പ്രാദേശിക ഉൽപ്പാദനം വർദ്ധിപ്പിക്കുന്നതിനായി 700 കോടി രൂപ വരെയുള്ള പുതിയ നിക്ഷേപത്തിനൊരുങ്ങുന്നു. കേന്ദ്ര സർക്കാരിന്റെ ‘പിഎം ഇ-ഡ്രൈവ്’ (PM E-Drive) പദ്ധതി പ്രകാരമുള്ള നിർബന്ധിത പ്രാദേശിക നിർമ്മാണ മാനദണ്ഡങ്ങൾ പാലിക്കുന്നതിനാണ് ഈ തുക പ്രധാനമായും വിനിയോഗിക്കുന്നത്.
നെക്സ്റ്റ് ജെൻ ഇലക്ട്രിക് ബസുകൾക്കും ട്രക്കുകൾക്കുമായി ഇതിനകം 400 കോടി രൂപ പ്രഖ്യാപിച്ച കമ്പനി, ബാറ്ററി പാക്ക് അസംബ്ലി യൂണിറ്റിനും ട്രക്ക് നിർമ്മാണത്തിനുമായി 200 മുതൽ 300 കോടി രൂപ വരെ അധികമായി ചിലവഴിക്കും. പുതിയ നിക്ഷേപത്തിലൂടെ വാഹനങ്ങളിലെ പ്രാദേശിക ഘടകങ്ങളുടെ അനുപാതം നിലവിലുള്ള 50 ശതമാനത്തിൽ നിന്നും 60 ശതമാനത്തിന് മുകളിലേക്ക് ഉയർത്താനാണ് കമ്പനി ലക്ഷ്യമിടുന്നതെന്ന് ഒലെക്ട്ര ഗ്രീൻടെക് സി.ഇ.ഒ മഹേഷ് ബാബു വ്യക്തമാക്കി.
പ്രതിവർഷം 2,500 യൂണിറ്റുകൾ നിർമ്മിക്കാൻ ശേഷിയുള്ള പ്രത്യേക ഇലക്ട്രിക് ട്രക്ക് നിർമ്മാണ ഫാക്ടറിയുടെ ജോലികൾ പുരോഗമിക്കുകയാണെന്നും 12 മാസത്തിനുള്ളിൽ ഇത് പ്രവർത്തനസജ്ജമാകുമെന്നും കമ്പനി അറിയിച്ചു. ശക്തമായ വിപണി ആവശ്യകതയുണ്ടെങ്കിലും, ആഗോള വിതരണ ശൃംഖലയിലെ തടസ്സങ്ങളും പെർമെനന്റ് മാഗ്നറ്റ് കയറ്റുമതിയിൽ ചൈന ഏർപ്പെടുത്തിയ നിയന്ത്രണങ്ങളും ഇലക്ട്രിക് ബസുകളുടെ വിന്യാസത്തെ നിലവിൽ ബാധിക്കുന്നുണ്ടെന്നും അദ്ദേഹം കൂട്ടിച്ചേർത്തു.
Electric commercial vehicle maker Olectra Greentech lines up an investment of Rs 700 crore to boost localization under the PM E-Drive scheme and set up an EV truck plant.
