ഹാർഡ്വെയർ സാങ്കേതികവിദ്യയിൽ സ്വയംപര്യാപ്തത കൈവരിക്കുന്നതിനും തങ്ങളുടെ എന്റർപ്രൈസ് ടെക്നോളജി അടിത്തറ ശക്തമാക്കുന്നതിനുമായി പ്രമുഖ ആഗോള സോഫ്റ്റ്വെയർ കമ്പനിയായ സോഹോ (Zoho) സ്വന്തമായി രൂപകൽപ്പന ചെയ്ത ‘നാഥു ലാ’ (Nathu La) സെർവർ പുറത്തിറക്കി. നിലവിലുള്ള മറ്റ് സെർവറുകൾക്ക് സമാനമായ പ്രവർത്തനക്ഷമത ഉറപ്പുനൽകുന്നതോടൊപ്പം 12 മുതൽ 18 ശതമാനം വരെ കുറഞ്ഞ വൈദ്യുതി ഉപഭോഗവും, ചെലവിൽ (TCO) 20 മുതൽ 30 ശതമാനം വരെ കുറവും നാഥു ലാ സെർവറുകൾ വാഗ്ദാനം ചെയ്യുന്നു. കമ്പനിയുടെ നാഗ്പൂർ കേന്ദ്രത്തിൽ വെച്ച് പ്രാദേശികമായി തെരഞ്ഞെടുത്ത യുവപ്രതിഭകൾക്ക് പരിശീലനം നൽകിയാണ് ഇതിന്റെ ഗവേഷണ-വികസന (R&D) പ്രവർത്തനങ്ങൾ സോഹോ പൂർത്തിയാക്കിയത്. എന്റർപ്രൈസ് ഹാർഡ്വെയർ രംഗത്ത് ദീർഘകാലാടിസ്ഥാനത്തിലുള്ള മുന്നേറ്റം ലക്ഷ്യമിട്ട് 2020 ലാണ് കമ്പനി നാഗ്പൂരിലെ ഈ കേന്ദ്രം ആരംഭിച്ചത്.
ഹാർഡ്വെയർ, ഫേംവെയർ, സിസ്റ്റം മാനേജ്മെന്റ് എന്നീ മേഖലകളിൽ അഞ്ച് വർഷത്തിലേറെ നീണ്ട നിരന്തരമായ ഗവേഷണങ്ങളുടെ ഫലമായാണ് നാഥു ലാ സെർവർ മദർബോർഡും ചേസിസ് പ്ലാറ്റ്ഫോമും വികസിപ്പിച്ചെടുത്തത്. ഇന്റൽ സിയോൺ 6 (Intel® Xeon® 6) പ്രൊസസറുകളെ അടിസ്ഥാനമാക്കി പ്രവർത്തിക്കുന്ന ഈ സെർവർ, വിർച്വലൈസേഷൻ (VM), ഹൈ-പെർഫോമൻസ് കമ്പ്യൂട്ടിംഗ് (HPC), ആർട്ടിഫിഷ്യൽ ഇന്റലിജൻസ് (AI) ഇൻഫറൻസ്, സ്റ്റോറേജ് ആപ്ലിക്കേഷനുകൾ എന്നിവയിലെ പ്രവർത്തനക്ഷമത മികച്ചതാക്കാൻ വേണ്ടി പ്രത്യേകമായി രൂപകൽപ്പന ചെയ്തിട്ടുള്ളതാണ്. ആഗോള ഹാർഡ്വെയർ നിർമ്മാതാക്കളെ ആശ്രയിക്കുന്നത് കുറയ്ക്കാനും കമ്പനിയുടെ ക്ലൗഡ്, എഐ അടിസ്ഥാനമാക്കിയുള്ള ഡാറ്റാ ആവശ്യങ്ങൾ കൂടുതൽ വേഗതയേറിയതാക്കാനും പുതിയ സെർവർ പ്ലാറ്റ്ഫോമിലൂടെ സോഹോയ്ക്ക് സാധിക്കും.
Zoho unveils the Nathu La server, a designed-in-India enterprise platform offering lower power consumption and reduced infrastructure costs.
