പ്രമുഖ ദക്ഷിണ കൊറിയൻ കപ്പൽ നിർമാണ കമ്പനിയായ എച്ച്ഡി ഹ്യുണ്ടായ് (HD Hyundai) തങ്ങളുടെ കപ്പൽശാലകളിൽ മനുഷ്യസഹായമില്ലാതെ സ്വയം പ്രവർത്തിക്കാൻ ശേഷിയുള്ള കൃത്രിമബുദ്ധി റോബോട്ടുകളെ വികസിപ്പിക്കുന്നു. 2030-ഓടെ കപ്പൽശാലകളെ പൂർണ്ണമായും ഡിജിറ്റലൈസ് ചെയ്ത് ‘ഫ്യൂച്ചർ അഡ്വാൻസ്ഡ് ഷിപ്പ്യാർഡ്’ ആക്കി മാറ്റാനുള്ള കമ്പനിയുടെ ലക്ഷ്യത്തിന്റെ ഭാഗമായാണ് ഈ നീക്കം. ഇതിനായി പ്രശസ്ത ആഗോള സാങ്കേതികവിദ്യ കമ്പനിയായ എൻവിഡിയയുടെ (Nvidia) ‘ഐസക് സിം’ (Isaac Sim) റോബോട്ട് സിമുലേഷൻ പ്ലാറ്റ്ഫോമാണ് കമ്പനി ഉപയോഗിക്കുന്നത്. നിലവിൽ ആമസോൺ, ബിഎംഡബ്ല്യു, ടൊയോട്ട തുടങ്ങിയ പ്രമുഖർ തങ്ങളുടെ നിർമാണ മേഖലകളിൽ ഉപയോഗിക്കുന്ന ഈ സാങ്കേതികവിദ്യ കപ്പൽ നിർമാണ രംഗത്ത് ആദ്യമായി കൊണ്ടുവരുന്നത് എച്ച്ഡി ഹ്യുണ്ടായ് ആണ്.
കപ്പൽ നിർമാണത്തിലെ പ്രധാന ജോലികളായ വെൽഡിങ്, പെയിന്റിങ്, പ്ലേറ്റ് ബെൻഡിങ് എന്നിവയാണ് ഈ ഫിസിക്കൽ എഐ റോബോട്ടുകൾ ആദ്യഘട്ടത്തിൽ ചെയ്യുക. നിലവിൽ കപ്പൽശാലകളിൽ മനുഷ്യർക്കൊപ്പം പ്രവർത്തിക്കുന്ന കൊളാബോറേറ്റീവ് റോബോട്ടുകളിൽ നിന്നും വ്യത്യസ്തമായി, പുതിയ തലമുറ റോബോട്ടുകൾക്ക് ചുറ്റുപാടുകൾ സ്വയം മനസ്സിലാക്കാനും നിർദ്ദേശങ്ങളില്ലാതെ തന്നെ കൃത്യതയോടെ ജോലികൾ ചെയ്യാനും സാധിക്കും. എൻവിഡിയയുടെ ഓമ്നിവേഴ്സ് ഡിജിറ്റൽ സാങ്കേതികവിദ്യയിലൂടെ കപ്പൽശാലകളുടെ അതേ മാതൃകയിലുള്ള വെർച്വൽ പശ്ചാത്തലം സൃഷ്ടിച്ചാണ് റോബോട്ടുകൾക്ക് പരിശീലനം നൽകുന്നത്. നിലവിൽ ലളിതമായ വെൽഡിങ് ജോലികൾ സ്വയം ചെയ്യാൻ ഈ റോബോട്ടുകൾക്ക് സാധിക്കുന്നുണ്ടെന്നും വൈകാതെ തന്നെ ഇവയെ പൂർണ്ണമായി കപ്പൽശാലകളിൽ വിന്യസിക്കുമെന്നും കമ്പനി അധികൃതർ വ്യക്തമാക്കി.
HD Hyundai is using Nvidia Isaac Sim AI robots to automate shipyard operations like welding and painting as part of its plan to build a fully digital Future Advanced Shipyard by 2030
